Sorumutuk entre reprezentante empreza Medfield Group iha Timor-Leste no SEFOPE iha salaun Becora. Imajen/SEFOPE

DILI, 20 abril 2022 (TATOLI)—Empreza Medfield Group hosi Austrália, iha fulan ne’e nia laran sei halo rekrutamentu traballadór timor-oan na’in-50 hodi ba serbisu ko’a na’an iha Austrália.

Inisiativa ne’e hato’o durante enkontru foin lalais entre reprezentante hosi empreza Medfield Group hamutuk ho Diretór Nasionál Empregu Exteriór iha edifídiu Becora, ho akompañamentu hosi asesór no Diretór Programa Pacific Labour Scheme (PLS).

Diretór Jerál empreza Medfield Group iha Timor-Leste, Dean McKenna, hateten, empreza ne’e kompremetidu sei halo rekrutamentu ba traballadór timor-oan sira ne’ebé naran iha lista work ready pool Sekretaria Estadu Formasaun Profesionál no Empregu (SEFOPE).

“Ami hakarak rekruta joven hosi Timor-Leste ba serbisu iha ami-nia empreza tanba traballadór timor-oan ne’ebé daudaun serbisu hela iha empreza ne’e hatudu komportamentu di’ak tebes kompara ho nasaun seluk,” Dean McKenna hateten liuhosi nota ne’ebé Agência TATOLI asesu, kuarta ne’e.

Notísia relevante: SEFOPE prepara timor-oan 86 arranka bá Austrália iha fevereiru

Durante sorumutuk ne’e, Diretór Nasionál Empregu Exteriór, Filomeno Soares, hato’o agradesementu ba empregadór ne’ebé hakarak integra joven timor-oan hodi serbisu hadi’a sira-nia moris no família.

“Ha’u husu ba empreza atu hasa’e númeru rekrutamentu traballadór timor-oan sira tanba ami prontu atu oferese traballadór timor-oan ho kualidade serbisu,” nia dehan.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here