Negosiante merkadu Maliana, Santina ‘Rika-Mau’ Maia. Imajen Tatoli/Sérgio da Cruz.

BOBONARO, 07 juñu 2022 (TATOLI) – Negosiante sira iha merkadu sentrál Maliana, husu ba Autoridade Munisípiu Bobonaro, atu tetu didi’ak desizaun molok implementa bazár movel iha merkadu Mau-Mali no Soso, tanba distánsia dook hosi kapitál munisipál.

Negosiante merkadu Maliana, Santina ‘Rika-Mau’ Maia, prontu koopera ba desizaun ne’ebé autoridade munisípiu foti, maibé kuandu reativa merkadu rua ne’e sei afeta ba menus rendimentu tanba distánsia dook.

Negosiante sira halo hela atividade negósiu iha merkadu sentrál Maliana, munisípiu Bobonaro. Imajen Tatoli/Sérgio da Cruz.

“Ami hakarak maibé bazár na’in iha Maliana ne’e oituan de’it, kuandu sábadu mak ema mai hosi Atsabe, Bobonaro, Hauba no rai seluk mak mai bazár, sé ita muda ba dook ema tuir ka lae tanba merkadu rua ne’e dook hosi vila laran, ne’ebé nai-ulun sira presiza hanoin didi’ak ba, sé lae ami-nia modo sira-ne’e dodok hotu mós ema la hola,” nia informa ba Tatoli, iha merkadu Maliana, tersa ne’e.

Nia haktuir, durante ne’e atividade negósiu iha loron bazár iha loron-sábadu, maioria negosiante sira hosi dook fa’an sira-nia produtu iha merkadu Maliana, tanba merkadu atuál lokaliza kedas iha sentru kapitál munisípiu.

“Agora sé muda ba dook ne’e ema sira-ne’e lakohi ba ona, tanba sira mai hosi foho, selu karreta karun, mina folin sa’e, depois ida tán mak ami ida ba fa’an ne’e bele ona maibé ida ba sosa ne’e mak ha’u la fiar nia kaer de’it $0,25 sentavu nia bele to’o soso ho Mau-Mali sosa modo futun ida, ne’e ha’u hanoin susar loos,” nia hateten.

Nune’e mós negosiante malus, Eugénia Soares, dúvida ho implementasaun bazár movel, tanba durante ne’e iha loron banbain no loron bazár sábadu mos hetan de’it rendimentu natoon.

“Ami sosa malus ho bua ne’e to’o $50 ba laten maibé bazár sábadu ne’e fa’an atu hotu de’it mós susar la halimar, dalaruma atu hetan de’it $1 dolar de’it mós hein to’o lokraik, ne’e mak boot sira dehan atu muda bazár troka malu ba merkadu Soso ho Mau-Mali, ami sira fa’an malus de’it ne’e hetan tán saida, hodi saida mak selu ojek, hodi saida mak sosa hahán,” nia hateten.

Purtantu antes ne’e, Diretor Jestaun Merkadu Turizmu Munisípiu Bobonaro, Henriquito Marques Leite, esplika planu reativa merkadu rua la’ós muda totál negosiante sira iha merkadu sentrál Maliana, maibé nu’udar alternativa ida atu atrai negosiante sira movimentá ba mai fazeadamente hodi implementa bazár movel iha loron-sábadu iha merkadu tolu ne’e.

Enkuantu objetivu implemeta bazár movel ne’e atu fó oportunidade ba parte hotu, hanesan negosiante, motorista anguna, mikrolete, ojek no transporte sira seluk bele hetan rendimentu hanesan.

Merkadu Maumali lokaliza iha aldeia Samelau, suku Ritabou, negosiante sira abandona durante tinan ida ona tanba akontese kazu ofensa integridade agravada ne’ebé hamate matebian Costódio Fátima, iha fulan-juñu 2021 liubá.

Nune’e mos merkadu Soso, lokaliza iha suku Holsa, dezde konstrusaun remata to’o agora negosiante sira seidauk utiliza hodi halo atividade negosiu tanba kestaun distánsia dook hosi kapitál Maliana, merkadu rua ne’e governu anteriór konstrui pakote ida de’it dezde 2019.

Notísia relevante: Parte hotu hetan rendimentu bainhira reativa merkadu rua iha Maliana

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here