Diretór Jestaun Merkadu no Turizmu Munisípiu Bobonaro, Henriquito Marques Leite. Imajen Tatoli/Sérgio da Cruz.

BOBONARO, 25 maiu 2022 (TATOLI) – Diretór Jestaun Merkadu no Turizmu Munisípiu Bobonaro, Henriquito Marques Leite, hateten planu autoridade reativa merkadu rua iha kapitál Maliana atu halo movimentu ne’ebé di’ak ba atividade negósiu hodi fó oportunidade ba parte hotu hetan rendimentu hanesan.

merkadu rua ne’ebé autoridae munisípiu Bobonaro planeia reativa iha fulan-juñu ne’e mak hanesan merkadu Mau-Mali ne’ebé lokaliza iha aldeia Samelau, suku Ritabou negosiante sira abandona durante tinan ida ona hafoin akontese kazu ofensa integridade agravadu ne’ebé hamate matebian Costódio Fátima iha fulan-juñu 2021 liubá.

Nune’e mós merkadu Soso, ne’ebé lokaliza iha suku Holsa, dezde konstrusaun remata negosiante sira seidauk utiliza hodi halo atividade negósiu tanba kestaun distánsia dook hosi kapitál. Merkadu rua ne’e governu anteriór konstrui dezde tinan 2019.

Nia subliña planu reativa merkadu rua ne’e la’ós atu muda totál negosiante sira iha merkadu  sentrál Maliana, maibé uza fali alternativu atrai negosiante sira movimentu ba-mai fazeadamente hodi implementa bazar loron-sábadu troka ba mai merkadu tolu ne’e.

“Ita uza meiu ida-ne’e atu ita-nia negosiante sira, parte motorista mikrolete, anguna no ojek sira bele hetan hotu rendimentu, tanba kuandu iha bazar konserteza ema barak mak movimentu ba mai,” nia informa ba Tatoli, iha kna’ar-fatin Holsa, Maliana, kuarta ne’e.

Molok reativa merkadu rua ne’e parte Servisu Jestaun Turzimu no Merkadu koopera ho autoridade munisípiu identifika ona kondisaun fasilidade bázika sira-iha merkadu rua ne’e, hanesan sintina públiku sei di’ak hotu, maibé bee-moos mak laiha tanba bee ne’ebé uluk kompañia fura iha tempu bailoron, fulan-outubru to’o novembru bee-maran.

Tanba ne’e bainhira hahú lansamentu sei koordena ho bombeiru atu lori bee-moos ba tau iha hariis-fatin no sintina sira nune’e bele fasilita kompradór no negosiante sira bainhira presiza.

“Ha’u husu ba negosiante sira iha merkadu Maliana atu koopera ho autoridade munisípiu oinsa ita bele dezenvolve ita-nia munisípiu liuhosi merkadu rua, ne’ebé i governu konstrui ona ba ita,” nia apela.

Negosiante merkadu Maliana, Aniceita Soares, aseita ho planu autoridade nian, maibé sujere molok reativa tenke kria uluk kondisaun nune’e ema hotu bele halo atvidade negósiu iha fatin ne’ebé seguru no saudável.

“Ha’u sente fa’an ba mai mós di’ak hela, maibé importante liu mak tenke tau polísia asegura ami  no monta CCTV iha-ne’ebá, tanba fatin ne’e dook hosi vila, depois uluk mós akontese problema ema oho malu besik merkadu Mau-Mali. Sé buat sira-ne’e iha ona ami prontu ba, sé lae, ema baku malu ami-nia sasán sira ne’e lakon hotu, depois ami labele hetan ona osan,” nia sujere

Molok ne’e liuhosi reuniaun iha loron 07/04 Komandante PNTL Munisípiu Bobonaro, Superintendente Antoninho Mauluta promote sei orienta membru sira halo seguransa másima iha merkadu rua ne’e no sei instala mós kamera CCTV iha área Mau-mali no Tunubibi atubele kontrola komunidade sira-nia movimentu iha tempu kalan no loron.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here