MSSI ho MS asina MoU kona-ba bolsa da mãe jerasaun foun. Imajen Tatoli/Osória Marques.

DILI, 07 juñu 2022 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten iha 17 jullu ne’e BNCTL no operadór Telkomcel sei halo pagamentu ba programa ba “bolsa da mãe jerasaun foun” iha Ainaro, Bobonaro no RAEOA.

Notísia Relevante: Asesu bolsa da mãe jerasaun foun, MSSI husu MS disponibiliza ‘LISIO”

Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques.

“Pagamentu ba benefisiáriu bolsa da mãe jerasaun foun ne’e Banku Nasionál Komérsiu Timor-Leste (BNCTL) no Telkomcel halo, iha munisípiu Ainaro, Bobonaro ho RAEOA tanba ofisiál rejistu halo ona rejistu ba benefisiáriu sira fulan ida ona, entaun ita bele halo pagamentu iha 17 jullu. Primeira-ves halo iha Timor-Leste,” Rui Gago hateten ba jornalista sira, iha ámbitu asina akordu ho Ministériu Saúde (MS) kona-ba bolsa da mãe jerasaun foun, iha salaun MSSI Caicoli, Dili, tersa ne’e.

BNCTL no Telkomcel mak sei halo pagamentu ba programa refere maibé depende ba benefisiáriu nia hakarak atu foti osan hosi ajénsia ida-ne’ebé, maibé Telkomcel hili halo pagamentu iha  Rejiaun Administrativa Espesiál Oé-Cusse Ambeno (RAEOA).

Nia dehan, pagamentu ne’e sei lansa no rejistu dahuluk iha munisípiu Ainaro no pagamentu dahuluk mak hala’o iha Bobonaro ho dadus estimasaun hamutuk 27.432.

“Dadus estimasaun 27.432 mak sai ami-nia planu hodi hetan osan no bele implementa programa refere. Maibé ida-ne’e la’ós dadus real tanba dadus ida-ne’e mak durante ne’e ami halo peskiza no hatudu katak iha populasaun hosi munisípiu tolu ne’e iha ema-ne’ebé moris ki’ak no mánutrisaun, nune’e ami hodi dadus ne’e sai hanesan ami-nia meta,” nia dehan.

Nia informa, osan ba programa bolsa da mãe jerasaun ne’e kuaze millaun $6,9.

Ministra Saúde, Odete Maria Freitasa Belo, hateten liuhosi programa bolsa da mãe jerasaun foun sei motiva inan isin-rua hodi hakbesik an ba fasilidade saúde.

“Liuhosi bolsa da mãe jerasaun foun ne’e, ami la haree ba osan maibé ami hosi saúde haree liubá oinsá impaktu hosi kustu maske ho montante kiik maibé ami espera bele motiva inan isin-rua sira atu hakbesik ba iha fasilidade saúde sira tanba to’o oras ne’e mai iha persentajen ne’ebé mak ladún di’ak,” nia hateten.

Tanba, tuir nia, bainhira inan isin-rua sira halo vizta iha sentru saúde dahuluk iha 100% maibé bainhira tama ba vizita tuir mai inan isin-rua laiha ona, no dala ruma partu iha uma ka iha ne’ebé, parte saúde laiha informasaun ida ba sira.

“Entaun ho programa ne’e bele ajuda inan isin-rua sira hodi halo tratamentu kompletu ho ita-nia pesoál saúde iha fasilidade saúde,” nia dehan.

Biban ne’e Ministra Odete agradese ba parseiru sira-ne’ebé ajuda ona hodi implementa programa ne’e iha Timor-Leste hodi bele redús númeru moras ba inan isin-rua, ho labarik no mós ho númeru mortalidade bebé ho inan sira.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here