Imajen/Media PR.

DILI, 03 juñu 2022 (TATOLI)—Parlamentu Nasionál aprova proposta ida hosi bankada opozisaun Partidu Demokrátiku (PD) ho nia medida tolu iha área agrikultura hodi tau ka prevee tan iha proposta-lei Grande Opsaun Planu (GOP) 2023.

Notísia Relevante: PN aprova proposta-lei Grande Opsaun Planu 2023 iha jeneralidade

Proposta ne’e aprezenta hosi Deputadu PD, Mariano Assanami Sabino, ho proposta númeru 2 hodi adita tan iha proposta lei-GOP ho nia artigu 3 kona-ba Grande Opsaun Planu 2023 númeru 3.

“Nune’e proposta númeru 2 pasa,” Prezidente Parlamentu Nasionál, Aniceto Longuinhos Guterres Lopes, fó sai iha reuniaun plenária extraordináriu iha ámbitu diskusaun ba Proposta lei GOP ba loron daruak iha PN, sesta ne’e.

Iha proposta hosi Mariani Assanami Sabino ne’e ho alterasaun medida aditada hanesan medida ho númeru 1.1.13 mak expande área planta hare ba aumenta produsaun foos.

Medida númeru 1.1.14 akizasaun tratór ba apoiu extensaun área kultiva foos no ikus liu mak medida númeru 1.1.15 akizisaun no ekipamentu pezadu ba asegura ba funsionamentu irrigasaun.

Ho justifikasaun sumáriu krize mundiál nu’udar lisaun imporante ho nesesidade ba auto-sufisiénsia ai-han hodi atende nesesidade doméstika, purtantu, nesesáriu akizisaun tratór ba expande área kultura foos no ekipamentu pezadu ba garante funsionamentu irrigasaun.

Rezultadu votasaun ba proposta númeru 2 ho nia medida tolu ne’e mak hanesan medida númeru 1.1.13 ho votu a-favór 61 kontra 1, abstensaun 0, no medida númeru 1.1.14 afavór 57 kontra 3, abstensaun no medida númeru 1.1.15 a-favór 38, kontra 20, abstensaun 4.

Deputadu Assanami hateten, proposta ne’e hakarak fó prioridade ba agrikultór sira tenke moderniza, hodi apoiu tratór no materiál kultivasaun atu dezenvolve makaas liután inklui iha parte pekuária, peska. Tanba ne’e proposta refere tau orienta Governu liuhosi MAP atu sosa tratór ne’ebé sei tau iha planu OJE 2023 no Governu mak sei define ba nia programa.

Nune’e, Deputadu hosi bankada opozisaun ne’e apresia no agradese ba deputadu sira hotu ne’ebé  a-favór ba proposta refere. Tanba, tuir nia, partidu sira presiza iha konsensu hamutuk ba GOP ne’e halo diskusaun atu haree saida mak prioridade ida sustentavél.

Deputadu KHUNTO no atuál Vise Prezidente Parlamentu Nasionál, Luis Roberto, heteten proposta ne’e importante tebes tanba setór agrikultura mak sei hadi’a ekonomia  nune’e presiza aloka orsamentu boot.

Nia   prefere, presiza sosa tratór foun tanba barak ne’ebé anteriór kondisaun ladi’ak no manutensaun gastu orsamentu boot liu fali atu sosa foun.

Deputadu Fretilin, David Dias ‘Mandati’, hato’o presiza duni akizisaun tratór foun duké manutensaun ba tratór anteriór nia kustu sei bootliu ho ida-ne’e espera saida mak Primeiru-Ministru pronunsia ona hein katak Governu bele diskute didi’ak hodi haree.

Primeiru-Ministru (PM), Taur Matan Ruak, fó komentáriu ba pontu rua de’it akizisaun tratór ho akizasaun ekipamentu pezadu.

“Foin dadauk iha primeiru reuniaun interministeriál ami deside katak envez agrikultura mós sosa tratór na verdade aplika de’it entaun Ministéiru Agrikultura no Peska (MAP) sei asina akordu ho Obra Públika uza ekipamentu pezadu ba ida-ne’e, tanba se lae ita duplika agrikultura iha tratór hodi uza hamutuk de’it,” Taur hateten.

Taur hateten, akizisaun tratór mak bele sosa tratór kiik maibé tratór boot ita hadi’a lai tanba Timor-Leste iha tratór boot bara-barak iha ne’e.

Ministériu Agrikultura no Peska (MAP), Pedro dos Reis, agradese ba Deputadu proponente hato’o ona proposta ka medida hodi tau iha Grande Opsaun Planu 2023 iha ministériu nian.

“Tan ne’e medida sira hato’o mai ami sei halo diskusaun didi’ak hodi prepara planu ba 2023 nian. Ba fali iha hanesan atu halo expansaun plantasaun hare ita iha tratór lubuk ida-ne’ebé mak iha terrenu nia kondisaun grave no kustu manutensaun boot. Ohin, Primeiru-Ministru pronunsia ona, ita sei hola tratór kiik entaun sei ajusta tékniku ba planu orsamentu 2023 nian no diskusaun sei la’o ami sei haree asuntu sira-ne’e, ein prinsípiu ami simu,” nia hateten.

 Jornalista : Nelson de Sousa

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here