Imajen/Media PR.

DILI, 02 juñu 2022 (TATOLI)—Parlamentu Nasionál (PN) liuhosi reuniaun plenária extraórdináriu, kinta ne’e, aprova proposta-lei númeru 40/V (4a) -Grande Opsaun Planu ba 2023 iha diskusaun faze jeneralidade ho votu a-favór 36, kontra 15 no abstensaun lima (5).

Notísia Relevante: PN no Governu hahú debate proposta lei Grande Opsaun Planu 2023

“Nune’e proposta lei Grande Opsaun Planu 2023 aprova iha jeneralidade hodi kontinua ba iha diskusaun espesialidade,” Prezidente Parlamentu Nasionál, Aniceto Longuinhos Guterres Lopes, deklara iha sala plenária Parlamentu Nasionál.

Tuir relatóriu komisaun C trata asuntu Finansa Públika  no komisaun espesializada sira ho  nia rekomendasaun ba Governu katak, liuhosi  Lei Enkuadramentu Orsamentu prevee definisaun montante totál despeza kada títulu orsamentál proposta hosi Governu iha proposta orsamentu define iha jornada orsamentál, atu iha aprezentasaun tuir mai indika informasaun adisionál Grande Opsaun Planu (GOP) verba ida-ne’ebé mak pretende aloka, no kada medida estratéjika aprezenta, ho forma Parlamentu Nasionál bele aferir orsamentál kada tinan.

No, próximo ano iha eventualidade medida aprezenta ho aumenta despeza ho reperkusaun iha tinan subsekente, aprezenta ba Parlamentu Nasionál indikasaun impaktu finanseiru ba tinan refere no tinan subsekente. 

Ministru Finansa, Rui Augosto Gomes, hateten ho publikasaun lei Enkuadramentu Orsamentál prosesu osamentu anuál muda ba faze rua; primeira mak reforsa papél PN rasik liuhosi Grande Opsaun Planu, no Governu espera bainhira proposta lei OJE to’o iha PN pratikamente 50% proposta lei OJE aprovadu ne’ebé sei vinkula Governu.

Iha ambitu área estratéjika reforma, nia dehan, Estadu hosi perspektiva Grande Opsaun Planu reforma fiskál jestaun finansa públika prioridade tebes tanba presipistu orsamentál ne’ebé sei akontese iha tinan 2035, nune’e reforma importante sira iha atu responde no mellora administrasaun finanseira setór públiku,

Reforma sira-ne’ebé akontese kontinuidade ba futuru ne’ebé VIII Governu Konstitusionál halo no reforma sira la’o dadaun hela ho forma sira seidauk kompletu, tanba ne’e iha Grande Opsaun Planu 2023 prevee ona konjuntu medida atu bele implementa iha tinan oin.

“Ezemplu, ita kontinua inplmenta regulamentasaun lei Enkuadramentu Orsamentál foin lalais promulga, mellora implementasaun orsamentasaun por programa iha instituisaun públika no bainhira lei Grande Opsaun ne’e aprova atu halo mellora iha prosesu planeamentu no prosesu transparénsia sidadaun sira-nian,” nia hateten.

Deputada Fretilin, Maria Angelina Rangel, hateten Grande Opsaun Planu 2023 sai hanesan liña orientasaun ba Orsamentu Jerál Estadu 2023.

Deputadu PD, António da Conceição ‘Kalohan’, hateten proposta lei Grande Opsaun Planu 2023 inisiativa ne’e di’ak no tenke hahú, nune’e bankada PD apresia inisiativa VIII Governu konstitusionál.

”Apresia bele sai meiu ita hotu konsensu kuandu haree planu dezenvolvimentu nasaun nian, ida-ne’e mak momentu oportunu maske daudaun ita tama ba fin mandatu besik eleisaun parlamentár maibé  ita presiza mai ho dalan ida tanba lei ida-ne’e mai ho buat foun,” nia dehan.

Tuir nia, bainhira haree lei Grande Opsaun medida sira-ne’e pratikamente lista atividade ne’ebé sei liga ho orsamentu jerál Estadu ninian loos atu haree.

Deputada CNRT, Virginia Ana Belo, hateten atu enfrenta peripísiu orsamentál ka fundu mina-rai sei maran dalan ida mak liuhosi reforma fiskál, maibé alterasaun lei tributária talves nia la’ós fó persentajen boot ba iha reseita doméstika no sei la subtitiu fundu mina rai tomak.

“Tanba, ita hatene ita-nia fundu mina-rai agora sai ameasadu. Ha’u hakarak haree liu ba área balun agrikultura fiar katak tau medida sira barak ne’ebé di’ak maibé triste tebes tanba membru Governu iha audiénsia la hatene atu justifika saida mak tuir loos nia planu no tama Grande Opsaun Planu nian,” nia hateten.

Tuir nia, laiha diferensa entre Grande Opsaun Planu ho Orsamentu Jerál Estadu aprova tinan-tinan programa ka medida sira prevee, ida-ne’e iha tiha ona ho tinan tolu la konsege ezekuta nune’e lahatene mandatu hela tinan ida bele ezekuta ka lae.

“Ha’u fó ezemplu ida halo barajen iha Komisaun D dehan imporante maibé iha Grande Opsaun Planu laiha proposta ne’e la tau, nune’e se bele identifika to’o saida mak prioridade loloos halo iha tempu mezmu badak iha tinan 2023,” nia kestiona.

Enkuantu, iha expozisaun motivu, lei númeru 2/2022, 10 fevereiru, Enkuadramentu Orsamentál Jerál Estadu no Jestaun Finanseira Públika, altera profundamente prosesu orsamentál hodi prevee existénsia Lei Grande Opsaun Planu.

Lei Grande Opsaun Planu, konkretiza previzaun kontida iha alínea d) iha númeru 3 artigu 95 no alínea d) númeru 1 artigu 115 konstituisaun repúblika, ho objetivu aprova opsaun anuál no plurianuál entermu planeamentu ho impaktu iha Orsamentu Jerál Estadu no programasaun orsamentál plurianuál.

Ho kriasaun Lei Grande Opsaun Planu prevee, finalmente, ligasaun dirasaun entre prosesu planeamentu orsamentasaun por programa.

Lei númeru 2/2022, 10 fevereiru, estabelese prosesu orsamentál faze daruak, faze primeiru sentrada lei Grande Opsaun Planu, diskute fixa prinsipál medida exekuta iha ano orsamentál tuir mai, no segunda faze sentra iha Lei Orsamentu Jerál Estadu ne’ebé deskute fixa dotasaun hodi finansia medida ne’e, ida-ne’e permite define ho detallu medida konkreta implementa hosi Governu, ne’ebé esensiál ba susesu orsamentasaun por programa. Maibé, permite mós eleva kualidade debate parlamentár ho distinsaun klara entre diskusaun medida no diskusaun finansiamentu.

Lei Grande Opsaun Planu signifika reforsu substansial kompeténsia Parlamentu Nasionál ba prosesu orsamentál tuir termu konstituisaun kabe ba PN aprova Orsamentu Jerál Estadu, hosi ne’e mós aprova ka reprova proposta lei aprezenta.

Proposta Lei Grande Opsaun Planu ba 2023 define 28 rezultadu nasionál ne’ebé atu alkansa através medida 263 organizada iha área estratéjika 16, define hosi Governu hanesan a) agrikultura, pekuária, peska no floresta, b) ekonomia no empregu, c) turizmu, d) dezenvolvimentu territoriál no habitasaun, e) ambiente, f) petróliu no minerál, g) eletrisidade no enerjia renovavel, h) konetividade nasionál, i) água no saneamentu, j) edukasaun no formasaun, k) saúde, l) inkluzaun no protesaun sosiál, m) kultura no patrimóniu, n) reforma Estadu, o), defeza no seguransa nasionál, p) relasaun internasionál no polítika externa.

Medida hirak ne’e anuál no plurianuál, ezekuta iha 2023, ho kontinuasaun iha kuatru ano subsekente.

Konforme lei númeru 2/2022, 10 fevereiru, medida aprezenta bazea iha Planu Estratéjiku Dezenvolvimentu ba 2011-2030, iha programa VIII Governu Konstituisionál no planu médiu prazu no planu anuál ba servisu no entidade setór públiku administrativu, ho mós dokumentu polítiku no estratéjiku hosi Governu, hanesan planu rekuperasaun ekonomika agostu 2020.

Programasaun orsamentál plurianuál aprezenta iha anexu prezenta proposta estabelese limite despeza totál setór públiku administrativu, projesaun reseita setór públiku administrativu, limite despeza iha variós sub-sektór no limete dívida públika iha valór absoluta no persentuais produtu internu brutu ba 2023 no ba kuatru ano subsekente.

Valór despeza globál setór públiku iha Orsamentu Jerál Estadu (OJE) ba 2023 define  ho montante $2,155,715.306.

Nune’e Governu aprezenta ba Parlamentu Nasionál, hosi alínea c) iha númeru 1 artigu 97 no alínea a) númeru 2 artigu 115 konstituisaun repúblika., purtantu objetu prezente diploma estabelse Grande Opsaun Planu ba 2023.

Proposta lei ne’e iha artigu hamutuk lima (5), hahú hosi nia expozisaun motivu, artigu 1 Objetu, artigu 2 Enkuadramentu, artigu 3 Grande Opsaun Planu, artigu 4 Programasaun orsamentál pluriannual no artigu 5 Entrada iha vigór.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here