Imajen/Media PR.

DILI, 03 juñu 2022 (TATOLI)—Parlamentu Nasionál (PN) liuhosi reuniaun plenária extraórdinariu, sesta ne’e, aprova proposta-lei númeru 40/V (4a)-Grande Opsaun Planu (GOP)  ba 2023 iha finál globál ho votu a-favór 42 kontra 18, no abstensaun rua (2).

Notísia Relevante: PN aprova proposta PD ba medida tolu área agrikultura prevee iha GOP

“Nune’e proposta lei Grande Opsaun Planu 2023 aprova iha finál globál,” Prezidente Parlamentu Nasionál, Aniceto Longuinhos Guterres Lopes, deklara iha sala plenária Parlamentu Nasionál iha diskusaun faze espesialidadde no aprovasaun final global ba proposta lei GOP.

Liuhosi deklarasaun votu, Deputadu PD, António da Conceição ‘Kalohan’, hateten PD vota a-favór tanba primeiru envolvimentu pozitivu deputadu sira envolve direta tanba tetu fiskál kada tinan aprova de’it hosi konsellu Ministru ida-ne’e mudansa tebes.

Segundu, hanoin iha mudansa di’ak hahú define prioridade hodi identifika problema hanesan planeamentu Parlamentu Nasionál hamutuk ho Governu determina prioridade Governu sira planea no husu.

“Ida-ne’e mak ita rekuñese entermu prozesaun ba prosposta lei ne’e,” nia dehan.

Deputadu KHUNTO no Atuál Vise Prezidente Parlamentu Nasionál, Luis Roberto, hato’o agradese ba VIII Governu Konstitusionál ne’ebé aprezenta  proposta-lei refere ne’ebé importante tebes bainhira to’o iha aprezentasaun tetu orsamentu entende molok tama no importante orsamentu 2023 mai, bele iha ona intendimentu di’ak.

“Nune’e, ami sempre a-favór no importante liu mak iha prioridade programa halo diskusaun kle’an loron hirak ne’e iha agrikultura, edukasaun, saúde no seluk tan,” nia hateten.

Vise Bankada Fretilin, António Bianco, fó parabéns ba Governu ne’ebé dala uluk hodi proposta-lei ne’e mai kumpre konstituisaun iha artigu 93 alínea 3 katak halo planu liga Orsamentu Jerál Estadu (OJE) kada tinan no Governu konsege kumpre Lei Enkuadramentu Orsamentál (LEO) no primeiru-vez Timor-Leste mós bele halo Grande Opsaun Planu.

“Lei ne’e sei orienta kualker Governu ne’ebé de’it inkui Parlamentu Nasionál preparasaun orsamentu halo preparasaun planu orsamentu ne’ebé sei hala’o poupansa osan fundu mina-rai no garante dezenvolvimentu sustentavél,” nia dehan.

Vise Bankada CNRT, Patrocinio Fernandes, hateten bankada CNRT vota kontra ba proposta-lei ne’e ho razaun fundamentál rua de’it hanesan primeiru lei ne’e ba tinan lima mai maibé mandatu hela tinan ida mak lori mai aprezenta iha PN ne’ebé define área 16. Tanba ne’e, CNRT haree laiha fatin Governu aprezenta lei refere iha ultimu mandatu.

“Ami laiha serteza Governu ida-ne’e kumpre iha planu no orsamentu anuál tanba orsamentu tinan rua ona fó dúvida konsisténsia Governu nian hato’o kompromisu ikus mai katak osamentu sira liu fulan ida ka rua hato’o fali urjénsia sobu programa no orsamentu,” nia hateten.

Deputada UDT, Francisco Carlos, fó kartaun verde ba GOP tanba beins estár ba povu, tanba UDT hanesan partidu istóriku ida sempre moderadu, nune’e partidu hotu hakarak povu ne’e nia moris di’ak, tanba ne’e depozita ba buat foun ne’ebé iha hodi kontinua ba oin,” nia dehan.

Enkuantu, iha exposizaun motivu, lei númeru 2/2022, 10 fevereiru, Enkuadramentu Orsamentál Jerál Estadu no Jestaun Finanseira Públika, altera profundamente prosesu orsamentál, hodi prevee existénsia Lei Grande Opsaun Planu.

Lei Grande Opsaun Planu, konkretiza previzaun kontida iha alínea d) iha númeru 3 artigu 95 no alínea d) númeru 1 artigu 115 konstituisaun repúblika, ho objetivu aprova opsaun anuál no plurianuál entermu planeamentu ho impaktu iha Orsamentu Jerál Estadu no programasaun orsamentál plurianuál.

Ho kriasaun Lei Grande Opsaun Planu prevee, finalmente, ligasaun dirasaun entre prosesu planeamentu orsamentasaun por programa.

Lei númeru 2/2022, 10 fevereiru, estabelese prosesu orsamentál faze daruak, faze primeiru sentrada lei Grande Opsaun Planu, diskute fixa prinsipál medida exekuta iha ano orsamentál tuir mai.

Segundu faze sentra iha Lei Orsamentu Jerál Estadu ne’ebé deskute fixa dotasaun hodi finansia medida ne’e, ida-ne’e permite define ho detalla medida konkreta implementa hosi Governu, ne’ebé esensiál ba susesu orsamentasaun por programa, maibé permite mós eleva kualidade debate parlamentár, ho distinsaun klara entre diskusaun medida no diskusaun finansiamentu.

Lei Grande Opsaun Planu signifika reforsu substansial kompeténsia Parlamentu Nasionál ba prosesu orsamentál tuir termu konstituisaun kabe ba PN aprova Orsamentu Jerál Estadu, hosi ne’e mós aprova ka reprova proposta lei aprezenta.

Proposta Lei Grande Opsaun Planu ba 2023 define 28 rezultadu nasionál ne’ebé atu alkansa atravéz medida 263 organizada iha área estratéjika 16, define hosi Governu hanesan a) agrikultura, pekuária, peska no floresta, b) ekonomia no empregu, c) turizmu, d) dezenvolvimentu territorial no habitasaun, e) ambiente, f) petróliu no minerais, g) eletrisidade no enerjia renovavel, h) konetividade nasionál, i)água no saneamentu, j) edukasaun no formasaun, k) saúde, l) inkluzaun no protesaun sosiál, m) kultura no patrimóniu, n) reforma Estadu, o), defeza no seguransa nasionál, p) relasaun internasionál no polítika externa.

Medida hirak ne’e anuál no plurianuál, ezekuta iha 2023, ho kontinuasaun iha kuatru ano subsekente.

Konforme lei númeru 2/2022, 10 fevereiru, medida aprezenta bazea iha Planu Estratéjiku Dezenvolvimentu ba 2011-2030, iha programa oitavu Governu konstituisional no planu médiu prazu no planu anual ba servisu no entidade setór públiku administrativu, ho mós dokumentu polítiku no estratéjiku hosi Governu, hanesan planu rekuperasaun ekonomika agostu 2020.

Programasaun orsamentál pluriannual aprezenta iha anexu prezenta proposta estabelese limete despeza totál setór públiku administrativu, projesaun reseita setór públiku administrativu, limete despeza iha variós subsektór no limete dívida públika iha valór absoluta no persentuais produtu internu brutu ba 2023 no ba kuatru ano subsekente.

Valór despeza global setór públiku iha Orsamentu Jerál Estadu (OJE) ba 2023 define ho montante $2,155,715.306.

Nune’e Governu aprezenta ba Parlamentu Nasionál, hosi alínea c) iha númeru 1 artigu 97 no alínea a) númeru 2 artigu 115 konstituisaun repúblika, portantu objetu prezente diploma estabelse Grande Opsaun Planu ba 2023.

Proposta lei ne’e iha artigu hamutuk lima (5), hahú hosi nia expozisaun motivu, artigu 1 Objetu, artigu 2 Enkuadramentu, artigu 3 Grande Opsaun Planu, artigu 4 Programasaun orsamentál pluriannual no artigu 5 Entrada iha vigór.

Enkuantu, iha diskusaun espesialidade ne’e deputadu sira hosi bankada Governu no opozisaun hanesan PD, aprezenta mós proposta hamutuk 17, ne’ebé proposta balun husu halo alterasaun uniformizasaun ba kestaun redasional la’os substansiál no proposta balun propoin adita tan medida foun balun iha proposta lei GOG.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here