Veteranu sira la'o ain hosi Palásiu Governu ba Centro Convenção Dili (CCD) hafoin partisipa Aniversariu loron veteranu nian ba dala-44 iha 03 marsu 2020. Imajen/Antonio Goncalves.

DILI, 03 junu 2022 (TATOLI)—Diretór Departamentu Pensaun no Sobrevivente, Ministériu Asuntu Kombatente Libertasaun Nasionál (MAKLN), Manuel dos Santos, hateten MAKLN sei loke no verifika fali reklamasaun 11.000-resin hosi veteranu no kombatente sira.

Notísia Relevante: Verifikasaun dadus veteranu rejistadu 2009 atinje ona 62%

Diretór ne’e hatutan, kombatente grau 4 a 7 ne’ebé pendente hosi tinan 2003 nian ne’ebé editál valida no públika tiha ona maibé kombatente 4 a 7 barak mak la konkorda, entaun sira halo reklamasaun no kontestasaun no la simu direitu ne’ebé iha.

“Kombatente 11.000 resin la konkorda desizaun hosi editál no sira hanoin, ha’u ne’e merese 8 a 14. Entaun sira lakohi simu osan no halo reklamasaun no kontestasaun ba Governu, maibé la signifika reklamasaun hotu sei aseita hotu, lae,” Diretór Pensaun no Sobrevivente ne’e hateten ba Agência TATOLI, iha nia knar fatin Caicoli, Dili, sesta ne’e.

Kona-ba kestaun ne’e, MAKLN ko’alia ona no deside atu loke fali hodi verifika reklamasaun hirak ne’e, karik merese 8 a 14 mak kontinua maibé karik la merese sei haree tan.

“Horisehik Ministru Asuntu Kombatente Libertasaun Nasionál hateten iha programa Governu ko’alia katak, fulan sira mai ne’e sei halo koordenasaun ho Konsellu Veteranu hodi haree kestaun ne’e. Signifika sei ba loke reklamasaun hodi haree konteúdu reklamasaun sira-ne’e. Tanba, politikamente ida dalan uitoan atu haree kestaun ne’e 4 a 7,” Manuel dos Santos hateten.

Maibé kona-ba ekipa atu haree kazu pendente ne’e, nia dehan, konserteza MAKLN hamutuk ho Konsellu Veteranu mak sei halo kompozisaun hodi haree natureza hanesan ne’ebé hafoin bele halo programa.

“Atu loke fali pendente ne’e, ita haree iha fulan besik nia-laran, bele fulan ida-ne’e la signifika liu tinan 2022. Ita bele dehan realiza ka akontese iha junu, jullu ka agostu nia-laran,” nia dehan.

Maibé, nia dehan, verifikasaun dadus veteranu rejistadu tinan 2009 nian atinje ona 62% no munisípiu Covalima, Dili Rejiaun Administrativa Espesiál Oé-Cusse Ambeno (RAEOA) mak finaliza ona.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here