Komunidade lokál no veteranu sira partisipa iha komemorasaun restaurasaun independénsia ba da-XX, iha suku Afaloikai, sesta (20/05). Imajen Tatoli/Vitorino Lopes da Costa

DILI, 02 junu 2022 (TATOLI)—Diretór Departamentu Pensaun no Sobrevivente, Manuel dos Santos, hateten ekipa verifikasaun nasionál halo verifikasaun ba dadus veteranu rejistadu ba tinan 2009 nian iha territóriu nasion ne’e to’o agora atinje ona 62%.

Notísia Relevante: Kombatente husu Lú Olo tau atensaun ba reverifikasaun dadus veteranu rejistadu 2009

“Ita bele dehan to’o ohin loron hosi númeru 124,600-resin, ha’u hakarak hateten verifikasaun dadus veteran rejistadu 2009 ne’e atinje ona 62%,” Manuel dos Santos hateten ba Agência TATOLI, iha nia knar fatin Caicoli, Dili, kinta ne’e.

To’o iha fulan-maiu liubá ne’e, ekipa verifikasaun finaliza ona munisípiu tolu mak hanesan munisípiu Covalima, Dili no Rejiaun Administrativa Espesiál Oé-Cusse Ambeno (RAEOA).

“Nível territóriu nasionál sei ramata iha novembru no hosi Munisípiu Baucau mak sei ikus tanba númeru kombatente barak liu. Maibé ha’u hakarak atu hateten katak Covalima, Dili no RAEOA finaliza hotu ona,” Manuel dehan.

Maske RAEOA finaliza sedu maibé Konsellu Munisipál RAEOA atu fó autorizasaun no estende tan tempu uitoan tanba iha númeru veteranu barak mak seidauk valida hotu tanba kestaun fatin.

“Tanba ita-nia kombatente barak moris fatin iha RAEOA maibé hela fatin atuál iha Dili no momentu rejistu ita enfrenta pandemia COVID-19, entaun sira labele ba rejistu nune’e Konsellu Munisipál husu estende tempu hodi verifika tan dadus ne’e,” nia dehan.

Entaun, verifikasaun faze daruak ba veteranu rejistadu 2009 nian, nia garante tinan ida-ne’e tenke fó resposta tanba verifikasaun ne’e sei ramata iha fulan-novembru tinan ne’e.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here