Eskola ESTV 28 Novembru, Pedro da Silva Ximenes. Imajen Tatoli/Rafy Belo

DILI, 03 juñu 2022 (TATOLI)–Eskola Ensinu Sekundáriu Jerál (ESJ) tolu no Ensinu Sekundáriu Tékniku Vokasionál (ESTV) ida iha munisípiu Dili distribui ona diploma ba estudante finalista na’in-1.813 ne’ebé termina estudu iha tinan 2021.

Eskola ne’ebé simu ona diploma hosi Diresaun Servisu Edukasaun Dili (DSED) hodi distribui ba estudante sira iha Eskola ESTV 28 Novembru Becora, Eskola ESJ 12 Novembru Becora, Eskola ESJ 05 de Maiu Becora no Eskola ESJ Nikolau Lobato Comoro.

Tuir Diretór Eskola ESTV 28 Novembru, Pedro da Silva Ximenes, diploma ne’ebé sira distribui ona ba estudante hamutuk 109, bazeia ba númeru estudante finalista ne’ebé aprovadu iha tinan kotuk, ne’ebé diploma sira ne’e eis Diretór Servisu Edukasaun Dili, Duarte Braganza asina hotu no entrega hikas mai eskola hodi prienxe valór, tanba ne’e foin mak halo distribuisaun.

“Durasaun tempu ba estudante finalista tinan 2021 simu diploma finál mak adia kuaze fulan-neen nia-laran tanba de’it mosu dezentendimentu, maibé buat hotu rezolvidu no diploma sira bele distribui ona ba estudante sira. Ami sente hakmatek ona tanba inan-aman sira la prejudika ona ami,” Diretór Eskola informa ba Agência Tatoli, iha Eskola 28 Novembru Becora, sesta ne’e.

Notísia relevante: Ministru Armindo konsidera despaixu sufisiente ba dirijente sesante asina diploma estudante

Nune mós, Diretór Eskola ESJ 12 Novembru Becora, Aniceto Pedro da Costa, haktuir, parte eskola distribui ona diploma ba estudante sira, bazeia ba númeru estudante finalista hamutuk na’in-650.

“Hafoin eis Diretór Servisu Edukasaun Dili asina tiha diploma estudante finalista sira mak entrega mai ami hodi prienxe valór, ne’ebé ramata hotu mak ita halo ona distribuisaun,” nia tenik.

Diretór Eskola ESJ Nicolau Lobato, Marcos Soares Paicheco, konfesa katak totál diploma ba estudante finalista tinan 2021 iha eskola ne’e hamutuk 345, ne’ebé parte eskola foin mak halo distribuisaun hotu.

Iha sorin seluk, Diretór ESJ 05 de Maiu Becora, Manuel Verdial, hateten, diploma estudante finalista tinan 2021 ne’ebé nia simu kompletu hamutuk 709.

“Eskola konsege distribui ona 400 no sei falta 309 mak seidauk distribui. Tanba ne’e, husu nafatin estudante sira ne’ebé mak simu ona diploma atubele pasa informasaun ba malu atu estudante ne’ebé seidauk mai foti diploma bele hakbesik-an mai eskola hodi foti sira-nia diploma,” nia hameno.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here