Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 11 maiu 2022 (TATOLI)–Ministru Edukasaun Juventude no Desportu (MEJD), Armindo Maia, konsidera karta despaixu ministeriál sufisiente ona hodi delega kompeténsia ba Diretór Servisu Edukasaun munisipál na’in-lima (atuál funsionáriu) atu asina diploma estudante finalista sira tinan 2021.

“Ita atu muda kontíudu ne’e oinsá, buat ne’e ita deside ona, tanba asesór legál sira fó ona paresér mai ha’u katak despaixu ministeriál ne’e legál,” Ministru hateten ba Agência Tatoli, iha resintu Parlamentu Nasionál, kuarta ne’e.

Tuir despaixu ministru ho númeru 73/GM-MEJD/III/2022 ne’ebé hatún iha loron 17 marsu 2022, ho konteúdu karta katak delega kompeténsia ba funsionáriu edukasaun munisipál iha munisípiu lima hanesan Aileu, Ainaro Covalima Dili no Ermera atu asina diploma estudante finalista 2021.

Notísia relevante: Eis Diretór Braganza seidauk entrega diploma estudante eskola 18 ba MEJD

Ba kestaun ne’e, Diretór Servisu Edukasaun munisípiu Dili, Duarte Braganza, hateten, bainhira Ministru lakohi muda konteúdu despaixu sei difikulta nia serbisu.

“Ha’u agora hanesan funsionáriu baibain ida, bainhira lakohi ona muda konteúdu hosi karta ne’e, ha’u mós sei la kontinua asina diploma estudante sira nian no ha’u sei trava hotu diploma sira, tanba ha’u mós hakarak asegura ha’u-nia an,” nia tenik.

Tuir Diretór sesante, diploma estudante finalista hosi eskola 18 ne’ebé nia asina ona tanba hetan konfiansa hosi Koordenadór Unidade Kurríkulu Nasionál.

“Ha’u asina estudante sira-nia diploma ne’e tanba Koordenadór mak garante katak ha’u asina daudaun hela estudante sira-nia diploma maka sira sei haruka fali karta seluk tuir mai, maibé agora asina tiha mak rona fali Ministru halo deklarasaun ba públiku katak labele muda konteúdu karta, maka ha’u mós sei la kontinua asina diploma sira ne’e, kuandu iha mudansa ha’u prontu asina filafali,” nia dehan.

Antes ne’e, Diretór Servisu Edukasaun Munisípiu Dili, Duarte Braganza inklui Diretór Servisu Edukasaun munisipál haat seluk hetan ona ezonerasaun, enkuantu naran iha diploma nível Sekundáriu Jerál no Tékniku Vokasionál tinan akadémiku 2021 uza sira-nia naran.

Mandatu Duarte Braganza lolos termina iha loron 31 dezembru 2021, maibé tanba mosu desizaun polítika, MEJD hasai despaixu ezonerasaun iha loron 31 outubru 2021 hodi nomea fali Carlito da Silva, nu’udar Diretór Servisu Edukasaun Munisípiu Dili foun.

Ba tinan akadémiku 2021, iha estudante finalista na’in-21.567 iha territóriu tomak mak termina ona estudu iha nível Sekundáriu Jerál no Tékniku Vokasionál.

Iha loron 13 dezembru 2021, estudante finalista hamutuk 58.224 iha territóriu nasionál partisipa ezame nasionál, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Nune’e, iha loron 20 janeiru 2022, MEJD anunsia rezultadu ezame nasionál hosi Eskola Ensinu Báziku no Ensinu Sekundáriu iha territóriu tomak, ne’ebé hatudu katak na’in-18 mak la pasa no 50.752 aprovadu, kompostu hosi estudante Ensinu Báziku 31.143 no Ensinu Sekundáriu 22.223.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here