Plenária Parlamentu Nasionál. Imajen Tatoli/António Gonçalves

DILI, 02 juñu 2022 (TATOLI)—Parlamentu Nasionál (PN), kinta ne’e, sei hahú dIskute proposta-lei númeru númeru 40/V(4a) kona-ba Grande Opsaun Planu ba 2023 iha faze jeneralidade.

NotÍsia Relevante: PN hahú audiensia públika ba proposta-lei Grande Opsaun Planu 2023

Tuir ajenda ne’ebé Tatoli asesu hosi PN, iha tuku 09h00 sei iha reuniaun plenária extraordináriu ho ajenda períodu orden do dia sei halo diskusaun no votasaun iha jeneralidade ba proposta lei númeru 40/V(4a)-Grande Opsaun Planu ba 2023.

Maibé, tuir informasaun hosi PN katak diskusaun ne’e labele hala’o iha oras ne’ebé determina ona hodi adia fila ba tuku 14h00 loron-manas tanba sei iha alterasaun balun ba relatóriu hosi komisaun.

Diskusaun ne’e sei lidera hosi Prezidente Parlamentu Nasionál, Aniceto Longuinhos Guterres Lopes, no parte Governu hetan partisipa mós hosi Primeiru-Ministru, Taur Matan Ruak, ne’ebé akompaña mós hosi membru VIII Governu Konstituisionál.

PN liuhosi Komisaun C ne’ebé trata asuntu Finansa Públika ne’ebé lideradu Prezidente Komisaun, Deputada Maria Angélica Rangel, antes ne’e hala’o ona audiénsia públika ho Governu reprezenta hosi Ministru Finansa, Rui Augusto Gomes, no ministéiru sira seluk hodi rona Governu ba inisia proposta-lei Grande Opsaun Planu ba 2023.

Enkuantu, exposizaun motivu lei númeru 2/2022, 10 fevereiru, Enkuadramentu Orsamentál Jerál Estadu no Jestaun Finanseira Públika, altera profundamente prosesu orsamentál, hodi prevee existénsia Lei Grande Opsaun Planu.

Lei Grande Opsaun Planu konkretiza previzaun kontida iha alínea d) iha númeru 3 artigu 95 no alínea d) númeru 1 artigu 115 konstituisaun repúblika, ho objetivu aprova opsaun anuál no plurianuál entermu planeamentu ho impaktu iha Orsamentu Jerál Estadu no programasaun orsamentál plurianuál.

Ho kriasaun Lei Grande Opsaun Planu prevee, finalmente, ligasaun dirasaun entre prosesu planeamentu orsamentasaun por programa.

Lei númeru 2/2022, 10 fevereiru, estabelese prosesu orsamentál faze daruak, faze primeiru sentrada lei Grande Opsaun Planu, diskute fixa prinsipál medida exekuta iha ano orsamentál tuir mai, no segundu faze sentra iha Lei Orsamentu Jerál Estadu ne’ebé diskute fixa dotasaun hodi finansia medida ne’e, ida ne’e permite define ho detalla medida konkreta implementa hosi Governu, ne’ebé esensiál ba susesu orsamentasaun por programa, maibé permite mós eleva kualidade debate parlamentár, ho distinsaun klara entre diskusaun medida no diskusaun finansiamentu.

Lei Grande Opsaun Planu signifika reforsu substansial kompeténsia Parlamentu Nasionál ba prosesu orsamentál tuir termu konstituisaun kabe ba PN aprova Orsamentu Jerál Estadu, hosi ne’e mós aprova ka reprova proposta-lei aprezenta.

Proposta-lei Grande Opsaun Planu ba 2023 define 28 rezultadu nasionál ne’ebé atu alkansa através medida 263 organizada iha área estratéjika 16, define hosi Governu hanesan a) agrikultura, pekuária, peska no floresta, b) ekonomia no empregu, c) turizmu, d) dezenvolvimentu territorial no habitasaun, e) ambiente, f) petróliu no mineral, g) eletrisidade no enerjia renovavel, h) konetividade nasionál, i) água no saneamentu, j) edukasaun no formasaun, k) saúde, l) inkluzaun no protesaun sosiál, m) kultura no patrimóniu, n) reforma Estadu, o), defeza no seguransa nasionál, p) relasaun internasionál no polítika externa.

Medida hirak ne’e anu’al no plurianuál, ezekuta iha 2023, ho kontinuasaun iha kuatru ano subsekente.

Konforme lei númeru 2/2022, 10 fevereiru, medida aprezenta bazea iha Planu Estratéjiku Dezenvolvimentu ba 2011-2030, iha programa VIII Governu Konstituisionál no planu médiu prazu no planu anuál ba servisu no entidade setór públiku administrativu, ho mós dokumentu polítiku no estratéjiku hosi Governu, hanesan planu rekuperasaun ekonomika agostu 2020.

Programasaun orsamentál plurianuál aprezenta iha anexu prezenta proposta estabelese limete despeza totál setór públiku administrativu, projesaun reseita setór públiku administrativu, limete despeza iha variós sub-setór no limete dívida públika iha valór absoluta no persentuál produtu internu brutu ba 2023 no ba kuatru ano subsekente.

Valór despeza globál setór públiku iha Orsamentu Jerál Estadu (OJE) ba 2023 define  ho montante $2,.155,715.306.

Nune’e, Governu aprezenta ba Parlamentu Nasionál, hosi alínea c) iha númeru 1 artigu 97 no alínea a) númeru 2 artigu 115 konstituisaun repúblika.

Proposta-lei ne’e iha artigu hamutuk lima (5),  hahú hosi nia expozisaun motivu, artigu 1 kona-ba Objetu, artigu 2 kona-ba Enkuadramentu, artigu 3 kona-ba Grande Opsaun Planu, artigu 4 kona-ba Programasaun Orsamentál Pluriannual no artigu 5 kona-ba Entrada iha vigór.

NotÍsia Relevante: PN baixa proposta-lei Grande Opsaun Planu 2023 ba Komisaun C

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here