Sesaun plenária iha Parlamentu Nasionál, sesta (05/11). Imajen Tatoli/Francisco Sony

DILI, 02 juñu 2022 (TATOLI)–Governu no Parlamentu Nasionál (PN), liuhosi sesaun plenária kinta ne’e, hahú debate proposta lei Grande Opsaun Planu (GOP) 2023 iha faze jeneralidade.

Tuir nota ne’ebé Agência Tatoli asesu, proposta lei ne’e kontein medida ka atividade prinsipál hamutuk 263 liuhosi programa 45 iha área estratéjiku 16 ne’ebé Governu sei foku iha tinan oin.

Proposta lei GOP inklui estimasaun orsamentu multi-anuál, hahú hosi 2023 to’o 2027 no mós tetu agregadu ba Orsamentu Jerál Estadu (OJE) 2023 ho montante biliaun $3,15 ne’ebé sei aloka ba Administrasaun Sentrál biliaun $2,8, Rejiaun Administrativu Espesiál Oé-cusse Ambeno (RAEOA) millaun $120 no seguransa sosiál millaun $235,7.

Nune’e, montante biliaun $3,15 ne’e inklui ona ho Fundu Kombatente Libertasaun Nasionál ho montante biliaun $1.

Iha proposta lei Grande Opsaun Planu, Ministériu Finansa (MF) mós aprezenta senáriu makroekonómiku ne’ebé prevee katak PIB la’ós Petrolíferu iha tinan 2022 sei krese ba 2,9% no 3,1% iha tinan 2023 ho inflasaun 6,7% iha tinan ida-ne’e.

Notísia relevante: PN sei diskute proposta-lei Grande Opsaun Planu 2023 iha faze jeneralidade

Antes ne’e, MF realiza ona Jornada Planeamentu, ne’ebé membru Governu no responsável entidade Estadu hamutuk 98 halo ona apresiasaun ba medida ka atividade prinsipál iha Grande Opsaun Planu ba 2023.

Medida tuir proposta inísiu hosi entidade Estadu hamutuk 4.000 resin, maibé hafoin MF halo rasionalizasaun tun ba 1.452 no iha proposta lei GOP tun ba medida 263 no liuhosi programa 45, organiza iha área estratéjiku 16.

Lei númeru 2/2022, 10 fevereiru kona-ba Enkuadramentu OJE no Jestaun Finanseira Públika mai altera prosesu orsamentál anuál ne’ebé antes ne’e prosesu orsamentál konsentra de’it iha aprovasaun lei OJE.

Ho promulgasaun lei foun enkuadramentu orsamentál hosi Prezidente Repúblika sesante, Francisco Guterres ‘Lú Olo’ iha fevereiru liubá, prosesu orsamentál anuál kompostu hosi faze rua mak hanesan lei GOP no lei OJE.

Lei GOP nia objetivu mak atu sai hanesan ponte ida entre dokumentu Planu Estratéjiku Dezenvolvimentu (PED), programa VIII Governu Konstitusionál, planu anuál no planu médiu prazu hosi servisu no entidade Estadu sira, no OJE.

Sesaun Plenária ne’e prezide hosi Prezidente Parlamentu Nasionál, Aniceto Longuinhos Guterres Lopes, akompaña husi membrus Meza Parlamentu Nasionál ho prezensa hosi Primeiru Ministru, Taur Matan Ruak, Ministru Finansa, Rui Gomes, inklui membru VIII Governu Konstitusionál.

Ministru Rui Gomes hetan akompañamentu hosi Diretór Jerál, Diretór Nasionál no tékniku sira hosi MF.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here