Ekipa selesaun nasionál U-23 Timor-Leste ho naran istimadu lafaek, derrota ho Cambodia eskore 1-2 iha jogu amigavél. Imajen/Espesiál

CAMBODIA, 02 maiu 2022 (TATOLI)— Ekipa selesaun nasionál U-23 Timor-Leste ho naran istimadu lafaek, kinta ne’e,  derrota ho Cambodia ho eskore 1-2, maske hatudu jogu ne’ebé brillante iha jogu amigavél iha Estádiu Nasionál Cambodia.

Jogu ne’e la’o ho di’ak tebes tanba iha minutu dahuluk jogadór sira hatudu jogu solidu tebes iha kampo laran no halo tuir sistema jogu ne’ebé treinadór Fabio Maciel fó ba durante treinamentu iha Qatar.

Iha jogu amigavél ne’e, jogadór Timor-Leste hatudu jogu brillante, maski armada lafaek tun ho jogadór ne’ebé la kompletu hanesan avansadu prinsipál na’in-rua hanesan Paulo Gally (21) no Elias Mesquita (7) la partisipa jogu tanba aleiza iha ain bainhira halao treinamentu iha Qatar.

Ekipa selesaun nasionál U-23 Timor-Leste ho naran istimadu lafaek, derrota ho Cambodia eskore 1-2 iha jogu amigavél. Imajen/Espesiál

Bainhira minutru primeiru hahú Timor-Leste loke kedan ho pasa bola ain ba ain ka halo jogu ne’ebé badak halo atrapalla jogadór selesaun nasionál seniór Cambodia nian la brani halo kontra-atake.

Timor-Leste domina bola barak liu ho sadik halimar jogadór Cambodia nian, maibé nonok de’it ho defensivu.

Ho dominasaun ne’ebé Timor-Leste iha, nune’e tama ba minutu 20, jogadór estrela Timor – Leste Mouzinho de Lima (10) hetan bola pasa ho kalma ida hosi jogadór avansadu Anizio Correia hodi lees kedan rede uma-na’in nian.

Hosi golu ne’ebé Mouzinho lansa hatur kedan Timor – Lerste lidera jogu 1-0, maibé jogu kontinua la’o nafatin, tanba ne’e Cambodia hafuhu hela de’it Timor – Leste nia fallansu. Nune’e iha minutu 38, jogadór Cambodia ho númeru kamizola 10 konsege aproveita oportunidade hodi halo golu primeiru hodi muda rezultadu nakfilak ba 1-1.

Ho golu ne’e, Timor – Leste la lakon esperansa nafatin hatudu jogu ne’ebé bonito iha kampu laran, maske joga iha adversáriu nia knuuk maibé la fó valda ba ekipa inimigu atu fura rede Timor-Leste nian nune’e jogu primeira parte termina ho empata 1-1.

Hakat ba segunda parte ekipa rua nafatin hatudu jogu ho kalma, maibé Timor-Leste nafatin hatudu jogu ne’ebé ho dignidade no ambisaun makas atu muda rezultadu maibé tarjetu Timor – Leste nian nunka kona iha alvu.

Teki-teki iha minutu 83, jogadór defeza Nelson Viegas halo falta iha liña oin Timor -Leste nian fó biban kedan ba Cambodia hodi sutu bola halo barullu iha rede Timor -Leste nia-oin ne’ebé aproveita di’ak hosi jogadór Cambodia númeru kamizola 14 termina kedan ho golu ida ho fó vitória.

Jogu hotu iha konferensia imprensa treinadór Timor-Leste Fabio Maciel da Silva hatoo kongratulasaun ba  jogadór Timor-Leste tanba  bele hatudu jogu di’ak tebes iha kampu laran.

Treinadór Prinsipál Selesaun Nasionál U-23, Fabio Maciel da Silva, partisipa iha konferénsia imprensa ba jogu amigavél ho selesaun nasionál senior Cambodia.Imajen/ Hortencio Sanchez

“Ha’u kongratula ha’u nia jogadór sira tanba sira hatudu jogu ne’ebé brillante iha kampu laran, maski lakon, maibé lakon ho dignidade, tanba ami ekipa U-23 hasoru ekipa uma-na’in ne’ebé senior ho jogadór mesak esperiénsia de’it, parabéns ba ha’u nia jogadór sira hotu,” dehan Treinadór Fabio.

Nia esplika iha primeira parte jogadór sira kontrola bola ho di’ak tebes, maibé iha segunda parte nafatin  kontrola di’ak,  iha sala uitoan de’it halo Cambodia uza oportunidade hodi hetan vitória.

Ho preparasaun ne’ebé sufisiente, jogadór sira halo viajen oras barak iha aviaun laran, kole maibé hatudu jogu di’ak.

Ho nune’e, nia fiar bao in Federasaun Futeból Timor-Leste sei prepara di’ak liután kondisaun jogadór sira nian atu mellora liután sira nia jogu atu labele para de’it iha ne’e.

“Iha agostu mai ne’e Timor – Leste iha ona liga ne’ebé la’o ho di’ak sei hetan tan jogadór foun barak atu reforsa selesaun nasionál,” nia espera.

Notísia relevante: Ekipa U-23 prepara halo jogu amigavél ho Cambodia

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here