Eis Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 02 juñu 2022 (TATOLI)—Atuál Deputadu hosi bankada CNRT, Arão Noe, prontu kolobora ho justisa ba notifikasaun hodi hatán iha Ministériu Públiku (MP), kona-ba kazu abuzu podér ne’ebé deskonfia nia komete bainhira asume kargu nu’udar Prezidente Parlamentu Nasionál iha tinan hirak liubá.

Notísia Relevante: MP husu PN hasai imunidade Arão Noe hodi halo inkeretu

“Prosesu ba ha’u-nia kazu hanesan sei iha segredu justisa nia laran, maibé hanesan sidadaun prontu kolabora ho justisa ba notifikasaun ruma atu ba halo audiénsia,” Deputadu Arão Noe hateten ba Agência Tatoli, iha Parlamentu Nasionál, kinta ne’e.

Nia klarifika katak, iha fulan fevereiru ne’e nia-parte simu pedidu notifikasaun ida mai hosi Prokuradór Jerál Repúblika (PJR) atu audénsia ka inkeritu hodi presta deklarasaun maibé momentu ne’ebé komisaun A iha tiha ajenda ba debate lei ida iha munisípiu Manufahi-Same

Ho ida-ne’e, nia parte labele marka prezensa no nia advogadu halo karta ida hosi husu pedidu adi’a, ne’ebé laiha kontexta ruma hodi aguarda tiha prosesu notifikasaun tuir mai tanba audiénsia primeiru husu adi’a.

Maibé iha fulan maiu ne’e nia laran PJR haruka fila-fali tan pedidu ida ba fali Parlamentu Nasionál (PN) atu halo levantamentu imunidade Deputadu Arão Noe.

Nune’e, nia dehan, Prezidente Parlamentu Nasionál, Aniceto Longuinhos Guterres Lopes, komunika ho Komisaun A hodi fó relatóriu paresér ba pedidu PJR nian maibé relatóriu komisaun nian katak PN labele halo levantamentu tanba prosedimentu legál iha kódiku penál artigu 8 no mós iha konstituisaun laiha dalan so juiz mak bele hato’o pedidu no PJR la presiza.

Tan ne’e, iha kinta (02 juñu 2022) ne’e, Prezidente Parlamentu Nasionál bolu Deputadu Arão Noe hodi halo esklaresimentu.

“Prezidente Parlamentu Nasionál bolu atu konfirma asuntu ne’e ha’u esklarese. Primeiru, ha’u labele marka prezensa ba audiénsia notifikasaun dahuluk ho razaun sira-ne’ebé temi. Segundu, notifikasaun dirije liu ba Parlamentu Nasionál la’ós hau hanesan Deputadu ka sidadaun ida kona-ba levantamentu imunidade. Maibé, tanba tuir paresér komisaun A katak levantamentu imunidade ne’e pedidu tenke hosi juiz la’ós hosi prokuradór,” nia hateten.

Tan ne’e, la’ós problema la koopera ho justisa, nune’e Prezidente Parlamentu sei komunika fali ba iha PJR katak levantamentu ne’e laiha no notifikasaun hato’o de’it ba Deputadu Arão Noe hodi bele ba direta presta deklarasaun no la presiza husu pedidu levantamentu imunidade.

“Ha’u prontu kolobora marka audiénsia ho data foun,” nia hateten.

Nune’e, eis Prezidente Parlamentu Naionál ne’e hateten, komentáriu sira oioin iha mídia sosiál katak nia parte halai hosi justisa, ida-ne’e falsu tanba hanesan sidadaun prontu koopera.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here