Labarik sira hala’o atividade faan sasán iha Merkadu Taibesi, tersa (31/8/2021). Imajen Tatoli/Antonio Gonçalves.

DILI, 01 juñu 2022 (TATOLI)—Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál sei halo diskusaun re-abertura ba artigu balun iha projetu-lei númeru 29/V(3a) kona-ba lei protesaun ba labarik no foinsa’e iha perigu, molok lori ba meza plenária.

Notísia Relevante: Komisaun F finaliza diskusaun projetu-lei protesaun ba labarik iha espesialidade

“Lei ida-ne’e iha fulan rua liu ba, ami halo tiha ona aprovasaun textu espesialidade tomak iha komisaun maibé presiza hadi’a entaun iha iha textu kona-ba objetu lei ninian,” Prezidente Komisaun F, Noé de Jesus ‘Buka Tuir’ hateten ba Agência Tatoli, Dili, kuarta ne’e.

Prezidente Komisaun F Parlamentu Nasionál, Noé da Silva Ximenes “Buka Tuir”. Imajen Tatoli/Francisco Sony.

Nia esplika, atu hadia kona-ba konteúdu objetu lei tanba konteúdu balun ko’alia kona-ba labarik sira ne’ebé sei iha kabun laran, entaun ida-ne’e kontrátoriu ho kódiku penál nune’e presiza hasai tanba lei ne’e proteje labarik ne’ebé moris ona iha kondisaun risku la hetan protesaun hosi Estadu, inan-aman no  komunidade.

Nune’e, iha semana oin komisaun sei haree hodi diskute hafoin bele aprezenta ona ba meza plenária Parlamentu Nasionál hodi ajenda diskusaun faze espesialidade no aprovasaun finál globál.

Aliénde ne’e, Prezidente Komisaun F ne’e hateten iha Deputadu hosi komisaun mós aprezenta proposta ba diskusaun plenária hodi elimina tiha kapítulu II ne’ebé ko’alia kona-ba direitu no dever labarik sira-nian hosi projeitu lei ne’e.

Tanba, iha títulu lei ne’e ko’alia kona-ba labarik sira-ne’ebé iha situasaun risku maibé iha kápitulu ne’e ko’alia labarik hotu-hotu iha direitu no devér maibé ne’e prevee ona iha konstituisaun garante ona.

“Tanba ne’e iha diskusaun espesialidade nível komisaun liu ona, maibé iha Deputadu balun inklui ha’u hakarak rekore ba plenária haree diskusaun ida kle’an, tan ita haree títulu lei la kondisiona ho kapítulu II nune’e presiza elimina tiha,” nia dehan.

Komisaun F iha espetativa ba projetu-lei ne’e tenke aprova ona iha kinta lejislatura ba tinan ne’e, nune’e bele proteje labarik no joven iha perigu iha iha situasaun risku iha Timor-Leste.

Preámbulu hosi projetu-lei ne’e previstu kona-ba dezenvolvimentu ida ba sistema protesaun integrál ba labarik sira, nune’e impoin esforsu armonizasaun lei hotu-hotu relasaun ho promosaun no protesaun diretu ba labarik no joven iha perigu sira.

Projetu-lei ne’e iha artigu hamutuk 103 no kapítulu hamutuk XI. Kapítulu I ko’alia kona-ba dispozisaun jerál, kapítulu II ko’alia kona-ba intervensaun ba promosaun direitu sira no protesaun labarik no joven iha perigu.

Kapítulu III ko’alia kona-ba medida promosaun direitu no protesaun, kapítulu IV ko’alia kona-ba komunikasaun, kapítulu V ko’alia kona-ba intervensaun Ministériu Públiku, kapítulu VI previstu dispozisaun prosesuál jerál, kapítulu VII sita kona-ba prosedimentu urjénsia, kapítulu VIII ko’alia kona-ba prosesu iha serbisu protesaun labarik no foinsa’e no kapítulu IX ko’alia kona-ba prosesu judisiál promosaun no protesaun.

Deputadu sira-ne’ebé sai proponente ba projetu-lei ne’e mak hanesan Noé da Silva Ximenes “Buka Tuir”, António Verdiál de Sousa, Felix da Costa “Anin Buras”, Cidália Mesquita Ximenes, Maria Gorumali Barreto, Helena Martins Belo, António Nobre Tilman, Lúcia Taeki, Veneranda Lemos Martins no Ernesto Fernandes “Dudu”.

Inisiativa lejizlativa ne’e bazea ba rezolusaun Parlamentu Nasionál númeru 16/2003, 30 jullu, ne’ebé Timor-Leste ratifika Konvensaun kona-ba Direitu Labarik.

Entidade sira-ne’ebé submete paresér ba projetu-lei ne’e mak hanesan ALFeLa, Asosiasaun Defisiente Timor-Leste (ADTL), Child Fund, Komisaun Nasionál Direitu Labarik, FOKUPERS, FONGTIL, JSMP, Ministériu Justisa, Ministériu Saúde, Ministériu Solidariedade Sosiál no Inkluzaun, Ministériu Públiku, no Organizasaun Internasionál ba Traballu (OIT), Parlamentu Foinsa’e, Plan International, PDHJ no UNICEF.

Iha 20 setembru 2021, Parlamentu Nasionál aprova ona projeitu lei ne’e iha faze jeneralidade ho votu a-favór 54, kontra 0 no abstensaun ida (1).

Notísia Relevante: Komisaun F sei halo re-abertura artigu hitu ba projetu-lei protesaun labarik

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here