Jogadór avansadu prinsipál Timor-Leste, Mozinho Barreto De Lima.Imajen/Espesial

CAMBODIA, 02 juñu 2022 (TATOLI)– Klube futeból Primeria divizaun Angkor Tiger FC iha nasaun Cambodia kontrata ona jogadór avansadu prinsipál Timor-Leste, Mouzinho Barreto De Lima atubele joga hamutuk ho klube ne’e iha époka 2022.

“Kontratu ha’u asina ona ho sira, ha’u aseita hotu ba buat ne’ebé sira (Angkor Tiger FC) fó mai ha’u,” Joagadór Selesaun Nasionál U-23 Timor-Leste ne’e, hateten  ba Agência TATOLI iha Hotel Phnom Penh Cambodia, kuarta ne’e.

Nia dehan hanesan jogadór ne’ebé idade nurak sente kontente no orgullu bele joga iha klube jigante ne’ebé koñesidu iha Ázia no Cambodia.

“Hanesan jogadór ha’u sente kontenete tanba ha’u labarik kikoan ida ne’ebé gosta halimar bola, bainhira gosta halimar bola too ikus sai realidade, reprezenta Selesaun too ikus klube internasionál nian hakarak uza ona ha’u ida ne’e ha’u kontente tebes,” nia orgullu.

Jogadór Timór-oan ne’e, asina kontratu ho klube Angkor Tiger FC iha loron 31 maiu, ho durasaun kontratu too dezembru tinan ne’e,  tuir durasaun liga Cambodia nian.

Mouzinho sei reforsa klube Angkor Tiger FC iha pozisaun Playmaker ou joga livre iha kampu klaran ne’ebé tuir duni nia-pozisaun ne’ebé daudaun iha selesaun nasionál hanesan avansadu prinsipál,maibé númeru kamizola mak klube Cambodia ne’e seidauk deside.

Posizaun Playmaker hanesan jogadór ne’ebé kontrola lala’ok jogu iha ekipa no dala barak envolve iha momentu ofensivu no defensivu hodi hatama golu, liuhosi vizaun, téknika, kontrola bola, kreatividade no abilidade passa.

“Kona-bá saláriu ne’ebé kada fulan, ha’u hetan hosi klube ne’e konfidensiál no la presiza fó sai ba públiku. Maibé  durante hela iha Cambodia klube mak sei tau matan hotu ba akomodasaun sira hotu,” nia afirma.

Nune’e, nia kompromete sei uza oportunidade ne’e hodi di’ak hodi hatudu prestasaun ne’ebé di’ak atu hamorin Timor-Leste nia naran, maski joga iha klube Cambodia, maibé reprezenta Timor-Leste.

Esperiénsia iha futeból

Mouzinho de Lima hahú kareira hanesan futebólista iha tinan 2010 ho idade ualu, hosi treinadór ne’ebé koñesidu ho naran Mister Kim no konsege hamutuk ho ekipa U-12, maski iha tempu ne’ebá Mouzinho labele liu iha selesaun hodi ba joga iha Koreia Súl tanba tinan seidauk too.

Maski nune’e Mouzinho la lakon esperansa maibé nafatin iha vontade halo treinamentu iha kampu Federasaun Futeból Timor-Leste (FFTL).

Klube futeból Cambodia “Angkor Tiger FC” kontrata ona jogadór Mozinho de Lima.Imajen/Espesial

Iha tinan 2012, Mouzinho kompleta ona tinan 12, ho vontade jogu ne’ebé iha fó ona konfiansa ba treinadór Kim hili nia tama iha selesaun nasionál U-12 hodi reprezenta Timor-Leste ba joga iha Koreia Súl

Arranka ba Koreia Súl, Mouzinho hamutuk ho nia amigo sira partisipa iha kompetisaun rua hanesan kopa MBC no kopa Jion-ji, maibé iha jogu rua ne’e só MBC de’it mak Mouzinho ho nia kolega sira tama too final, maibé iha tiru penalidade ekipa derrota no sai segundu lugar de’it.

Iha 2013, Mouzinho nafatin hetan konfiansa hosi treinadór Kim hanesan jogadór U-14 hamutuk ho nia kolega sira nafatin reprezenta Timor-Leste ba tuir kompetisaun Jion-ji too ikus sai hanesan primeiru lugar. Iha momentu ne’e Timor-Leste konsege tama final kontra Portugál ho rezultadu eskore 1-0 hodi sai primeiru lugar.

Bainhira fila tia hosi kopa Jion-ji iha 2013 nia klaran, Mouzinho nafatin hetan konfiansa hamutuk ho nia kolega sira fila hikas ba Koreia hodi tuir festival futeból nian ne’ebé partisipa hosi nasaun barak no Timor – Leste konsege sai hanesan segundu lugar tanba la konsege manán Vietname ho jogu bolu “seven site” ka joga na’in hitu-hitu.

Nune’e,  iha 2014, nia dala ida tan hamutuk ho selesaun fila hikas ba Koreia tuir kompetisaun Jion-ji la konsege manán tanba lakon ho Barcelona iha oitavu finál.

Ho prestasaun ne’e, iha 2015  jogadór   ne’e hetan kedan konfiansa sai ba jogadór iha selesaun nasionál U-16 hamutuk ho nia amigo sira reprezenta Timor-Leste ba joga iha Brunei Darusalam iha festival Asian Football Confederation (AFC) nian ne’ebé konsege sai segundu lugar.

Iha 2016, Mouzinho nafatin hamutuk ho nia kolega sira reprezenta Timor-Leste iha festival CPLP nian ne’ebé hala’o iha Cabo-Verde, ne’ebé Timor – Leste la konsege hetan vitória iha eventu mundiál ne’e.

Maski idade seidauk too 19, maibé ho prestasaun ne’ebé extra-ordinariu ka brillante tebes, nune’e iha 2018 hetan ona konfiansa hosi treinadór Kim hodi partisipa iha jogu Asian Football Association (AFF) iha Surabaya-Indonézia maibé lakon de’it iha faze grupu tanba iha jogu primeiru ho Myanmar empata, segundu ho Malázia mós empata, no konsege manán Brunei, maibé jogu ikus kontra Cambodia lakon ne’ebé la konsege hakat ba semi-finál.

Bainhira fila hosi AFF liu de’it loron ida kontinua kedan arranka ba São Tome e Prinsipe partisipa festival CPLP nian ho nune’e jogadór ne’e nafatin iha vontade la sente kole tanba iha nia kakutak futeból mak nia futuru.

Iha 2018,  Mouzinho hetan nafatin fiar hosi treinadór Eduardo Pereira, maski sei idade 16 hamutuk ho selesaun U-21 reprezenta Timor – Leste ba joga iha kompetisaun Hasanal Bolkiah no Timor – Leste konsege hetan primeiru lugar.

Haree ba prestasaun ne’ebé di’ak tebes, iha 2019, Mozinho hetan ona konfiansa hosi treinadór selesaun nasionál U-23, Norio Sukitete.

Ho konfiansa hirak ne’e iha treinadór, Fabio Maciel da Silva nia tempu 2021 bolu nafatin Mozinho hamutuk ho nia kolega ekipa U-23 partisipa iha jogu AFF nian iha Cambodia too ikus Timor -Leste sai terseiru lugar ba dala uluk.

Klube futeból Cambodia “Angkor Tiger FC” kontrata ona jogadór Mozinho de Lima.Imajen/Espesial

Iha 2021 too 2022, Mouzinho nia performe di’ak tebes iha kompetisaun AFC, AFF no Sea Games Vietname halo klube Tiger laran monu hodi kontrata atu reforsa klube ne’e.

Enkuantu esperénsia ho klube sira mak bainhira Liga Futeból Amadora hamrik iha 2015 no jogu la’o másimu iha 2016, jogadór Mozinho hamutuk kedan ho SLB Laulara ne’ebé  Prezidente Klube mak líder nasionál Kay Rala Xanana Gusmão.

Hamutuk ho SLB Mouzinho konsege lori sorte ba SLB tanba sai kedan primeiru lugar ba liga Timor-Leste.

Mouzinho hamutuk ho SLB hahú iha 2016 too 2021, nune’e, iha 2021 nia klaran nia hetan kontratu hosi Boavista Timor atu reforsa klube ne’e, maibé jogu la la’o tanba COVID-19, nune’e nia deside fila hikas ba SLB.

Biodata badak

Jogadór Mouzinho, moris iha Maliana, 26 juñu 2002. Oan hosi Mario de Lima no Adelina Barreto. Nia hanesan oan ikun hosi maun alin na’in-neen, kompostu hosi feto tolu no mane tolu.

Mouzinho hahú nia estudu Pre-Primária iha 2004 too 2005. tama iha Ensinu Primaria iha tinan 2006 too 2011 no iha tinan 2013, tama Ensinu Pre-Sekundáriu Santa Madalena de Canossa Haslaran Dili, iha klase primeira de’it, Madre sira deside hasai nia tanba la tuir ezame. 

Nune’e, jogadór ne’e deside ba kontinua fali nia Eskola Pre-Sekundáriu iha Cristal Dili, hafoin ramata kontinua kedan ba Eskola Ensinu Sekundáriu FINANTIL-Dili no daudaun nia eskola hela iha Universidade Nasionál Timor-Lorosa’e (UNTL).

Tama iha mudu futeból la’ós ema ida mak obriga, maibé ho vontade rasik tanba nia aman mós hanesan futebólista, maibé ladun másimu tanba dalabarak liu mete iha Boxe.

“Uma laran ha’u mesak de’it mak tama iha futeból seluk laiha hotu, ha’u nia papa jogadór bola hotu, maibé ladun tanba nia mete barak liu iha Boxe,” nia informa.

Notísia relevante:  Gally hahú treina iha klubu ida iha España 

Jornalista Hortencio Sanchez

Editór    : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here