Jogadór Timor-Leste, Paulo Gally halo kontra no atake hodi hamonu jogadór Thailandia nian iha jogu AFF 2021 ne'ebé hala’o iha Singapura foin lalais ne'e. imajen/Espesiál

MALÁZIA, 01 maiu 2022 (TATOLI) – Jogadór estrela Timor –Leste Paulo Gally Freitas daudaun ne’e hala’o ona formasaun iha klubu Antequera iha nasaun España, kontinente Europa.

Klubu Antequera funda iha sidade Antequera, iha loron 27 jullu tinan 1915, hahú sai klubu organizadu no profisionál iha tinan 1992.  Antequera nu’udar klubu futeból España nian ho ninia sede iha Antequera, iha komunidade autónoma Andaluzia, España, kontinente Europa no klubu refere oras ne’e joga iha Segunda Divizaun Real Federasaun Española Futeból (RFEF, sigla española).

“Ha’u agora treinu hamutuk hela ho klubu ida iha España naran “Antequera”. Sente di’ak los treinu iha ne’e atubele hetan esperiénsia foun,” dehan Gally ba Agência TATOLI liuhosi WhatsApp iha Malázia, domingu ne’e.

Nia dehan, durante loron hira ona iha España buat hotu la’o di’ak no formasaun mós la’o di’ak.

Durasaun formasaun mak nia seidauk hatene loos too bainhira mak remata hodi hakat ba faze seluk. Tanba ne’e nia nafatin foka ba formasaun hodi hakle’an liután nia koñesimentu.

Gally nia prestasaun iha mundu futeból konsege dada klubu internasional sira-nia matan, bainhira nia hatudu jogu brillante iha kompetisaun kopa Asian Football Federation (AFF) iha Kambodia fulan hirak liubá.

Gally nia esperiénsia iha futeból

Ba jogadór fitun ne’e, dezafiu saida no oinsá de’it mak mosu tenke hasoru no simu ho hamnasa-midar, tanba ida-ne’e hanesan luta ida-ne’ebé tenke buka manán ninia an rasik liuhosi luta maka’as.

Atu manán dezafiu foun iha nia moris, obstakulu ne’e dezafia Paulo Gally Freitas ne’ebé foin halo idade tinan 18 ne’e tenke hasoru dezafiu foun iha nia moris.

Razaun, tanba nia hetan krítika moruk hosi nasaun lubuk no timor-oan balun hodi dun-matak katak nia falsifika tinan-moris iha jogu internasionál Asian Football Federation (AFF) U-15 foin lalais ne’e iha Tailándia.

Maibé, ba jogadór ne’ebé moris iha 31 dezembru 2004 ne’e, la hatudu oin ta’uk hasoru krítika maibé hetok nia simu-hasoru ho ho oin-midar no hakmatek hodi hasoru presaun hirak-ne’e.

Gally sai sentru atensaun ba adversáriu sira tanba nia iha esesu nu’udar jogadór avansadu ne’ebé badinas kaer bola no matenek kedok bola hodi hatama golu, liuhosi hatudu ninia asesu iha jogu AFF ne’ebé nia eleitu sai mellór markadór ho golu lima iha jogu refere.

Ninia fíziku atlétiku, isin mutin no ain aas. Tanba ne’e, sé matan fihir sala, ema bele haree sala dehan nia la’ós moris iha tinan 2004, maski liuhosi rezulatdu teste médiku iha Sentru Saúde AFF no AFC nian la hatudu faktu katak nia falsifika nia tinan moris.

Estudante Ensinu Sekundáriu Katóliku Kristal ne’ebé hahú nia karreira futeból iha Sentru Juvenil FFTL iha tinan 2011 ne’e hateten, ba oin, kontinua mantein nia pozisaun hodi hatudu jogu ne’ebé di’ak liután, nune’e bele lori Timor-Leste nia naran morin iha mundu liuhosi mundu futeból.

Liafuan “Aifuan monu la dook hosi nia hún” ne’e merese hanesan karimbu ida prega ba oan hosi João da Costa Freitas no Ana Maria Martins Nascimento, tanba fatór jenétiku hosi nia inan ne’ebé uluk hanesan jogadora ida, lori Gally daudaun hanesan jogadór estrela iha Timor-Leste.

“Ha’u-nia pai uluk sei ki’ik la mete futeból. Só ha’u-nia mãn de’it mak halimar bola. Tanba ne’e, ha’u tuir ha’u-nia maen nia ain-fatin,” Oan dalimak hosi maun-alin na’in-neen (6) ne’ebé oras ne’e sai jogadór avansadu prinsipál iha klube Lalenok United FC ho númeru kamizola 21 ne’e ho oin midar.

Jornalista   : Hortencio Sanchez

Editór         : Evaristo Soares Martins

PUBLISIDADE HUSI MTCIiklan

1 KOMENTÁRIU

  1. Parabens jogador TL ho naran Galy nebe ba halo treinamentu iha Spana e bom suksesu
    Hakarak sai jogador strela tenke hakdok an buat hotu
    Save atu suksesu iha mundu fotbal mak Disiplina
    Saude importante (fisiku)
    Fiar no halo tuir treinador nia exemplar

HAKEREK NO HATÁN

Please enter your comment!
Please enter your name here