Labarik sira bainhira simu Prezidente Republika, José Ramos Horta, hodi selebra loron mundiál labarik iha palásiu prezidensiál Nicolau Lobato, Bairru Pite, kuarta (01 juñu 2022). Imajen Tatoli/Antonio Daciparu.

DILI, 01 junu 2022 (TATOLI)—Embaixadora Plan Internasionál Timor-Leste (PITL), Cidália Lopes Nobre Guterres, hateten, husu Parlamentu Nasionál presiza aprova lalais Lei Protesaun ba labarik no joven iha perigu ne’ebé Komisaun A PN aprova ona iha debate espesialidade.

Notísia Relevante: Komisaun F sei halo re-abertura ba artigu balun projetu-lei protesaun labarik

“Ha’u espera katak Parlamentu Nasionál aprova lalais lei protesaun ba labarik no joven iha perigu, atu nune’e bele asegura no proteje labarik no joven sira-nia direitu,” Embaixadór PITL ne’e hateten ba jornalista sira, hafoin partisipa loron mundiál labarik ho tema “O futuro do mundo depende da Felicidade das criancas do presente”,
iha Eskola Bázika Filial, Fomentu, Dili, kuarta ne’e.

Embaixadora ne’e hatutan, aporvasaun lalais lei refere atu labarik feto ho mane no joven feto ho mane iha direitu asesu livre ba edukasaun.

“Se ita ko’alia kona-ba direitu ema nian, la’ós ba ema ne’ebé moris di’ak de’it mak problema la kona mak ita defende sira, maibé sira ne’ebé lian laek, nonok hela, la ko’alia sai, bele sente katak direitu ba sira hotu nune’e la’o livre, aprende, partisipa no moris hakmatek,” nia dehan.

Aleinde ne’e, distánsia eskola dook bele fó kontribui hotu no ida seluk mak falta koñesimentu liu-liu ba saúde reprodutiva, tanba kuaze labarik barak mak ladún hatene entaun hakfodak mai isin-rua tiha ona, entaun dalan mak halo abortu no seluk mak soe bebe tanba laiha isin-rua ne’ebé planeadu.

“Ho buat sira-ne’e hotu mak ita hanoin fahe nafatin informasaun halo sensibilizasaun ba ita-nia alin feto no mane no mós joven feto no mane kona-ba matéria reprodutiva hodi hasa’e sira-nia koñesimentu tanba matéria ne’e importante tebes,” nia dehan.

Koordenador Eskola Bázika Filial Fomento, António Ximenes, hateten sente orgullu tebes tanba atividade ida-ne’e foin primeiru-vez Plan Internasional hala’o iha eskola ida-ne’e.

“Ha’u sente urgullu tanba atividade komemorasaun loron mundiál labarik foin primeira-vez halo iha eskola ida-ne’e maibé PN tenke aselera hodi aprova lalais lei protesaun labarik nune’e fó mahon ba estudante sira ne’ebé ho idade joven,” nia hateten.

Estudante hosi EBF Fumento, António Tilman sente haksolok no kontente ba atividade ida-ne’e no husu atu bele hadook vioolénsia hosi labarik siea.

“Ami hakarak fó ami-nia direitu ba asesu edukasaun saúde, livre asesu saida de’it mak dezenvolviementu iha Timor-Leste no hadook violénsia hosi ami labarik sira,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here