Traballadór timor-oan, João Lucas Assunção. Imajen/Espesiál

DILI, 31 maiu 2022 (TATOLI)—Traballadór timor-oan, João Lucas Assunção, hakotu-iis iha Koreia Súl tanba sofre moras tuberkuloze (TBC) iha kakutak no pulmaun.

“Ita-nia traballadór João Lucas ne’ebé agora mate, tanba moras TBC iha kakutak, pulmaun no ‘pleural fluid’,” Família matebian, Renato da Silva de Deus, ne’ebé hanesan mós estudante iha Koreia Súl, informa ba Agência Tatoli, via telefónika, tersa ne’e.

Nia konta tuir, matebian hetan moras hahú iha loron 01 setembru 2021, ne’ebé durante nia serbisu durante semana rua resin, nia komesa sente kolen no la tahan malirin, ikus mai laiha forsa atu kontinua serbisu, entaun empreza ne’ebé nia serbisu haruka nia bá deskansa.

Notísia relevante: SEFOPE haruka tan traballadór timor-oan 87 serbisu iha Koreia Súl

Maski nune’e, João Lucas kontinua moras, entaun responsável empreza inklui nia maluk timor-oan sira lori kedas  bá ospitál.

“Ema hotu hanoin katak nia pozitivu COVID-19 tanba nia temparatura sa’e ba 38, ho nune’e  ospitál atu haruka nia ba kuarentena, maibé hosi médiku sira haree nia kondisaun laduun di’ak, entaun haruka nia ba Chungnam National University Hospital ne’ebé mak iha fasilidade kompletu hodi deteta nia moras TBC.

Nune’e, matebian baixa iha kuidadu intensivu ospitál Chungnam ne’e durante fulan-haat no hahú hosi 01 setembru to’o 10 dezembru 2021.

Hafoin ida-ne’e, matebian muda fali ba Ospitál Nam Young Geriatric, hosi loron 15 dezembru 2021 no to’o loron 29 maiu 2022, iha tuku 05:28 dadeersan oras lokál nia hakotu iis.

Matebian serbisu iha koreia Súl iha empreza Daecheon Flavored Seaweed, hahú iha loron 05 juñu 2021 no tuir kontratu sei ramata iha loron 05 juñu 2024.

Kona-ba prosesu atu transporte mate-isin mai Timor-Leste, reprezentante família dehan, daudaun ne’e nia parte hamutuk ho adidu Timor-Leste iha Koreia Súl halo esforsu, nune’e iha fulan-juñu ne’e bele transporta mate-isin mai Timor-Leste.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here