Ekipa saneamentu kontinua raut lixu ne’ebé komunidade soe iha estrada ibun iha área Comoro, tersa (18 janeiru 2022). Imajen Tatoli/Antonio Dasiparu.

DILI, 31 maiu 2022 (TATOLI)—Koordenadór Jestaun Merkadu Taibesi, António Manuel de Araujo, preokupa ho empreza ne’ebé Governu kontrata la raut lixu iha merkadu Taibesi, ne’ebé iis ona hodi fó impaktu ba negosiante sira-nia saúde.

Notísia Relevante: Governu aumenta tan kamioneta 20 rekolla lixu iha kapitál Dili

“Lixu ne’ebé empreza sira la mai foti iha Merkadu Taibesi ne’e ha’u preokupa, tanba bainhira kamionete la foti lixu tuir oras, ha’u mós informa mai iha Xefe Departamentu Saneamentu Munisípiu Dili tanba lixu iis ona no fó impaktu ba negosiante sira-nia saúde”, António Manuel de Araujo hateten ba Agência Tatoli iha resintu munisípiu Dili, tersa ne’e.

Tuir nia, Governu liuhosi Autoridade Munisípiu Dili fó ona kontratu ba empreza sira, atu ho sira-nia kamioneta foti lixu iha ne’ebá maibé realidade empreza sira la mai raut lixu iha merkedau refere.

“Parte pesoál limpeza jestaun merkadu nian hatene limpeza lori mai tau iha lixeiru, agora atu foti lixu ne’e ami laiha kompetensia tomak atu lori sai. Tanba iha ne’e fornese ona kamioneta ba sira no sira mak tenke atende tuir oráriu kontratu ne’ebé sira ba foti. Agora lixu husik hela iha ne’e, ami só relata mai iha ne’e (Munisípiu Dili), tanba sá kamioneta sira la mai foti lixu”, nia dehan..

Tanba, nia dehan iha 2021 ne’e empreza sira balun badinas rekolla lixu tuir oráriu kontratu maibé ida-ne’e sira falla uitoan, tanba kada loron ne’e komunidade prodús lixu aumenta barak.

Xefe Departamentu Saneamentu Munisípiu Dili, Domingos Soriano, hateten lixu iha Merkadu Taibesi sai hanesan fonte ba fatin lixu, tanba foer ne’e empreza sira raut ona maibé nakonu hela de’it.

“Se ami parte hosi saneamentu no kompañia dala ruma foti lixu tarde, tanba sei teste mina, roda kuak no kamioneta falla, ida-ne’e bele tarde oras ida no rua ne’e iha. Entaun, ho sira ne’e hotu mak fó impaktu ba lixu sira-ne’ebé foti tarde. Ida-ne’e akontese, maibé buat hotu hosi transporte kuandu la’o di’ak, sente fatin ne’e redus hosi lixu”, nia dehan.

Entretantu, tuir dadus hosi Koordenadór Jestaun Merkadu Taibesi, António Manuel de Araujo, katak totál vendedór sira-ne’ebé hala’o atividade negósiu iha Merkadu Taibesi hamutuk 2.902.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here