Primeiru-Ministru, Taur Matan Ruak, akompaña hosi membru Governu relevante foto hamutuk ho Embaixadór Austrália no ekipa empreza ASN, hafoin asina akordu iha salaun PCM, Palásiu Governu, tersa (31/05). Imajen Tatoli/António Daciparu

DILI, 31 maiu 2022 (TATOLI)—Governu Timor-Leste asina kontratu, tersa ne’e, ho empreza Alcatel Submarine Network (ASN), ba projetu kabu submarinu fibra ótika entre sidade Dili, Darwin no Port Hedland, Austrália.

Entidade ne’ebé reprezenta Governu halibur iha komisaun interministeriál kompostu hosi Ministériu Planu no Ordenamentu (MPO), Ministériu Finansa (MF), Ministériu Koordenadór Asuntu Ekónomiku (MKAE) no Ministériu Transporte no Komunikasaun (MTK).

Primeiru-Ministru, Taur Matan Ruak. Imajen Tatoli/António Daciparu

Primeiru-Ministru (PM), Taur Matan Ruak, konsidera, asinatura kontratu ne’e marka istória tanba projetu ne’e inisia atu dezenvolve desde iha tinan 2015, aleinde ne’e marka mós istória ba programa VIII Governu Konstitusionál, ne’ebé posibilidade asesu kualidade rede internet másima, lalais, inklui estabilidade no seguransa ba Timor-Leste.

“Ho ida-ne’e garante asesu rede internet ba iha territóriu Timór no redus kustu internet. Nu’udar mós pasu importante atu diversifika ekonomia no redús dependénsia ekonomia petrolífera,” PM Taur hateten iha ámbitu asina kontratu iha salaun Prezidénsia Konsellu Ministru (PCM, sigla portugés), Palásiu Governu.

Notísia relevante: Governu aprova konkursu públiku internasionál sosa no instala fibra ótika

Entidade relevante dada-lia iha ámbitu asina akordu iha salaun PCM, Palásiu Governu, tersa (31/05). Imajen Tatoli/António Daciparu

Investimentu ba Projetu ne’e hahú ho Option Agreement iha tinan 2017 hodi halo estudu Front-End Engineering Design (FEED), ne’ebé estudu ne’e finaliza iha tinan 2019 no hetan aprovasaun hosi Governu Timor-Leste, nune’e lansa projetu ne’e ba públiku iha tinan 2020 no mós prosesu aprovizionamentu konklui iha 2022.

Governu Timor-Leste nia espetativa ba prosesu implementasaun projetu kabu submarinu fibra ótika ho durasaun fulan-19, ne’ebé sei hahú hosi 01 jullu 2022 no finaliza iha 31 janeiru 2024.

Entidade relevante dada-lia iha ámbitu asina akordu iha salaun PCM, Palásiu Governu, tersa (31/05). Imajen Tatoli/António Daciparu

“Kontratu públiku ne’ebé ami asina ho empreza ho montante totál millaun $38,6 hodi sosa no halo instalasaun ligasaun dijitál kabu submarinu fibra ótika hosi Austrália mai Timor-Leste,” P akresenta.

Orsamentu ba investimentu estratéjiku projetu fibra ótika ne’e sei finansia 100% hosi Governu Timor-Leste. Aleinde ne’e, Governu mós hetan apoiu kontribuisaun finanseiru hosi Governu Austrália liuhosi empreza Vocus hodi halo estudu Front-End Engineering Design (FEED).

Empreza Vocus mak operadór telekomunikasaun lisensiadu ida-ne’ebé hanesan mós segundu maiór proprietáriu no operadór rede fibra ótika iha Austrália.

“Governu Timor-Leste iha esperansa katak liuhosi investimentu ida-ne’e, sei hasa’e velosidade internet, halo redusaun ba folin internet no mós liu-liu sei fasilita Governu Timor-Leste nia servisu Governu Eletróniku ‘E-Government’ ne’ebé di’ak liu,” Xefe Governu otimista.

Vise Primeiru-Ministru no Ministru Planu no Ordenamentu, José Maria dos Reis. Imajen Tatoli/António Daciparu

Iha biban hanesan, Vise Primeiru-Ministru no Ministru Planu no Ordenamentu, José Maria dos Reis, hateten, projetu estratéjiku ne’e maka lori ona tempu ida naruk.

“Primeiru-Ministru no membru Governu sira ne’ebé hola parte iha komisaun interministeriál halo esforsu tomak hodi aselera preparasaun no implementasaun kabu submarinu fibra ótika hodi sai mós marka ida importante ba iha VIII Governu nu’udar Governu ne’ebé halo daudaun ona reforma ba setór teknolojia no komunikasaun hodi habesik Timor-Leste ba era dijitál,” Vise PM afirma.

Reprezentante empreza ASN, Craig Carter. Imajen Tatoli/António Daciparu

Reprezentante empreza ASN, Craig Carter, sente onradu boot ida hodi bele asina akordu ida ne’e.

“Hau hakarak agradese ba Governu Timor-Leste no timor-oan tomak ba sira nia fiar hodi eskolla ASN. ASN nu’udar empreza ne’ebé mak lidera iha merkadu industria sub-mariñu ne’ebé mak iha ona esperiénsia tinan 160 nia laran susesu ona iha manufatura no instalasaun fibra ótika ho kilómetru 700.000 iha nasaun barak,” Craig Carter subliña.

Enkuantu, empreza ASN instala dahuluk kabu submarinu entre Fransa no Estadu Unidu Amerika (EUA) iha tinan 1.840.

“Ami iha prova rejiaun Asia Pasífiku no instala ona sistema kabu submarinu fiber óptika iha rejiaun Oceana iha tinan-10 ba kotuk, ASN ne’e empreza globál, ho velosidade internet ne’ebé mak lais sei fó benefisia ba kresimentu ekonomia liuhosi indústria oioin. Nune’e, ho velosidade internet ne’ebé mak lais sei fó oportunidade hodi hasa’e kualidade edukasaun, iha setór agrikultura, agrikultór sira sei aprende prátika agrikultura no seluk tan,” nia dehan.

Iha fulan kotuk, Konsellu Ministru aprova ona projetu deliberasaun, ne’ebé aprezenta hosi MOP, ba aprovasaun prosedimentu aprovizionamentu konkursu públiku internasionál ba ajudikasaun kontratu públiku atu sosa no halo instalasaun ligasaun dijitál iha Timor-Leste liuhosi kabu submarinu fibra ótika ba sidade Darwin no Port Hedland, Austrália.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here