Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno. Imajen Tatoli/Francisco Sony

DILI, 30 maiu 2022 (TATOLI)Ministra Negósiu Estranjeiru no Kooperasaun, Adaljiza Albertina Xavier Reis Magno, informa, tempu besik sei arranka ba Portugal hodi realiza selebrasaun akordu bilaterál ho Governu portugés hodi fasilita timor-oan ba serbisu.

“Governu liuhosi Embaixada iha Portugal agora tenta hela atu negosia ho Governu portugés atu ita bele iha akordu bilaterál ho Portugal, tanba to’o agora timor-oan sira uza pasaporte Timór ba de’it iha ne’ebá maibé la hatene atu ba serbisu iha ne’ebé, buka asuntu sira ne’e komplikadu oituan. Tanba ne’e maka Embaixada iha Portugal tenta ona atu asina akordu bilaterál atubele fasilita timor-oan sira bá serbisu iha Portugal ho pasaporte Timór,” Ministra Adaljiza relata hafoin hala’o reuniaun ho Xefe Governu iha Rezidénsia Farol, segunda ne’e.

Notísia relavante: PN ratifika ona akordu mobilidade entre Estadu membru CPLP

Ministra dehan, foin lalais mós lori ona tratadu ba iha Parlamentu Nasionál (PN).

“Ha’u lori ona tratadu ida ba Parlamentu Nasionál kona-ba mobilidade Komunidade País ho Lian Portugés (CPLP, sigla portugés), ne’ebé bazeia ba tratadu ne’e ita bele halo akordu ho nasaun membru CPLP sira inklui Portugal hodi ita bele formaliza tiha timor-oan sira ba serbisu iha ne’ebá, bele mós sira simu hanesan traballadór sazonál hanesan Governu haruka bá Austrália, agora prosesu hela,” nia akresenta.

Tuir Ministra, tanba tratadu ne’e presiza depozita, maka tempu badak iha ámbitu vizita traballu ba Europa mak aproveita realiza.

“Akordu ne’e presiza depozita, ha’u rasik tenki lori ba sede CPLP hodi depozita akordu ne’e. Hosi ne’e, kuandu rekoñese akordu vigora ona, entaun ita presiza ko’alia ona ho Governu portugés hodi formaliza akordu entre país rua, hodi timor-oan sira bá serbisu iha Portugal. Fulan oin ha’u sei vizita traballu ba Eropa no ha’u sei liu Portugal atu depozita tratadu ne’e iha Sekretáriu Ezekutivu CPLP hodi formaliza ita-nia akordu,” governante ne’e tenik.

Kuandu formaliza ona maka Governu sei informa ba nasaun membru CPLP hotu katak Timór prontu atu negosia akordu bilaterál mobilidade.

“Mobilidade ne’e inklui traballadór hotu, tantu skill no non skill, tanba Portugal nu’udar Timór nia belun boot, entaun sira mós hakarak ita bele iha akordu non skill. Vantajen hosi akordu ne’e ba Timór maka estudante sira bele bá-mai iha nasaun membru CPLP hodi eskola, funsionáriu sira ezempu médiku sira bele apply bá serbisu iha rai CPLP, nune’e mós dosente. Iha modalidade lima, maibé laiha ba non skill, maibé Portugal hakarak nakloke simu timor-oan non skill, bazeia ba ida-ne’e ita bele loke klauza ida ho sira hodi promete atu altera sira-nia lei atu fasilita timor-oan sira,” Ministra esplika.

 Jornalista : Antónia Gusmão

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here