Imajen/Media PR.

DILI, 25 abríl 2022 (TATOLI)—Parlamentu Nasionál ratifika ona akordu kona-ba mobilidade entre Estadu membru Komunidade País Lian Portugés (CPLP, siglá portugés), nune’e akordu ne’e bele vigór ona iha Estadu Timor-Leste.

Notísia Relevante: Governu aprova proposta rezolusaun ratifika akordu mobilidade Estadu membru CPLP

“Rezultadu votasaun a-favór 45, kontra 0 no abstensaun 0, nune’e proposta rezolusaun númeru 9/V/4a aprovadu,” Prezidente Parlamentu Nasionál, Aniceto Longuinhos Guterres Lopes, anunsiu liu hosi plenária iha Parlamentu Nasionál, segunda ne’e

Tuir relatóriu paresér hosi Komisaun B trata asuntu Defeza, Seguransa no Negósiu Estranjeiru ne’ebé lideradu hosi Deputadu, José Agostinho Sequeira ‘Somotxo’, ho nia konkluzaun katak prezente proposta rezolusaun aprezenta kontribuisaun reforço laços humanos, solidariedade no fraternidade entre povu ka komunidade lian portugés sira-nia identidade.

Nomós promove medida ho objetivu rezolusaun ba problema enfrenta hosi komunidade imigradas CPLP iha Estadu menbru no koordenasaun reforsu kooperasaun iha domíniu polítika imigrasaun, kada Estadu legislar oinsá fasilita sirkulasaun sidadaun iha espasu CPLP.

Akordu reprezenta reforsu relasaun amizade no kooperasaun entre membru CPLP ne’ebé importante tebes ba sidadaun CPLP nian hotu iha faze inisiál determinante ba profesór, estudante, emprezáriu, ajente kulturál no atleta.

Nune’e, Komisaun B rekomenda atu ratifika akordu ne’e hodi kontribui ba reforsu fraternidade entre povu CPLP ho faktu promove era foun iha domíniu sirkulasaun sidadaun.

Ministra Negósiu Estranjeiru no Kooperasaun (MNEK), Adaljiza Magno, hateten mobilidade iha espasu CPLP prepara planu kle’ur ona kuaze tinan 10 diskute.

“Iha ita-nia tempu ka’er nu’udar Prezidente rotativu CPLP nian iha 2014-2016, ida-ne’e sai asuntu ita bele iha akordu ida entre membru nasaun CPLP hodi iha akordu ida kona-ba mobilidade,” nia dehan.

Tanba, tuir nia, sei fasilita sirkulasaun povu nasaun membru, tanba rekuiñese katak organizasaun sira sei bolu malu hanesan komunidade se sidadaun nasaun CPLP laiha liverdade tama-sai, ida-ne’e mós hanesan obstakulu ida atu bele halo interasaun.

Hafoin halo diskusaun naruk entre nasaun menbru nasaun CPLP sira, ikus liu durante prezidénsia Cabo Verde nian aprezenta ona akordu mobilidade hodi ema hotu bele iha liberdade tama sai iha nasaun CPLP hirak ne’e.

Akordu ida-ne’e, bainhira ratifika liu-liu nasaun membru CPLP nian sei estabelese tan prosesu ida bilateralmente.

“Se Timor-Leste ratifika tiha sei halo inisiativa ko’alia ho nasaun sira seluk. Ezemplu komesa ho Portugál, Brazíl, Moçambique no Angola hodi iha fila-fali akordu bilaterál ida, hodi estabelese akordu ida bazea ba tratadu ne’ebé mak ita atu ratifika,” bia esplika.

Nia dehan, iha artigu 7 hosi akordu ne’e fó prioridade liu ba kategória lima iha nasaun membru CPLP.

“Akordu ne’e sei fó prioridade liu ba iha kategória sira hanesan dosente, profesór, emprezáriu hodi ita bele enkoraza emprezáriu sira hosi CPLP investe iha ita-nia rain no ajente kulturál hanesan artista sira no mós estudante. Kategória lima ne’e mak sai prioridade ba país sira atu estabelese uluk akordu bilateral, maibé ita iha liberdade estabelese komforme ita-nia regulamentu doméstika hodi ita bele hakarak fali aumenta tan kategória sira seluk,” nia dehan.

Akordu ne’e nasaun membru nasaun CPLP hotu-hotu ratifika ona, só hela Timor-Leste ho Guine Equatorial mak seidauk, nune’e se TL ratifika hotu sei informa ba sekretáriu ezekutivu CPLP bele tama vigór.

Jornalista : Nelson de Sousa

Editór       :  Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here