Prezidente Repúblika, José Ramos Horta, felisita Arsebispu Arkidiozese Metropolitania Dili, Don Virgílio do Carmo da Silva, SDB, ne’ebé Papa Francisco nomea atu sai Kardiál dahuluk uma kreda Timor-Leste nian. Imajen/Espesiál.

DILI, 30 maiu 2022 (TATOLI)–Prezidente Repúblika (PR), José Ramos Horta, kongratula Arsebispu Arkidiozese Metropolitania Dili, Don Virgílio do Carmo da Silva, SDB, ne’ebé hetan nomeasaun hosi Papa Francisco atu sai Kardeál dahuluk uma kreda Timor-Leste nian.

Notísia Relevante: PN aprova votu kongratulasaun ba Don Virgílio atu sai Kardeál dahuluk

“Ohin, mai iha ne’e, aprezenta ha’u-nia parabéns ba povu no igreja Timor-Leste no Dnm Virgílio, no abrigadu ba Santu Papa Francisco ne’ebé nomea ita-nia Arsebispu Arkidioseze Metropolitanu Dili atu sai kardeál dahuluk ba uma kreda Timor-Leste nian,” Xefe Estadu ne’e hateten ba jornalista sira hafoin ramata sorumutu ho Don Virgílio do Carmo iha  Kámara Eklisiatika, Lecidere, segunda ne’e.

Hanesan prinsípiu istória igreja importante tebes figura Kardeál ne’ebé prestijiu boot tanba Don Virgílio nia esperensia, matenek, simplisidade iha umildade mak Amu Papa Fransisco hili nia atu sai sai Kardiál.

Xefe Estadu ne’e sente kontente hanesan timor-oan ba nomeasaun ne’e  bainhira Timor-Leste selebra loron restaurasaun indepedensia ba dala-XX (20 maiu 2022-20 maiu 2022).

“Timor-Leste iha populasaun 98% katólika entermu perkapita persentajen iha mundu, ita konsidera Timor númeru ida ka entre rai nasaun lima maiória katóliku boot liu persentajen Filipina, Brazíl. Ne’ebé, 98% ne’e boot, laiha rai barak iha mundu ne’e,” nia dehan.

Ne’eduni, todan ne’ebé igreja iha Amu Papa Francisco nomea Kardiál kolaboradór direitu nu’udar timor-oan sente kontente tebes.

Laureadu Nobel da Paz ne’e hateten, forsa Igreja Timor-Leste iha istória no mundu hanesan instituisaun moris impériu boot sira iha mundu, hahú impériu Romanu.

Nune’e, Xefe Estadu ne’e kompromete durante mandatu kontinua parseria metin ho igreja, relasaun espesiál ho setór oioin ba hametin dame iha rai-laran liuhosi rekonsiliasaun, edukasaun, kultura no identidade.

Arsebispu Arkidioseze Metropolitana Dili, Don Virgílio do Carmo da Silva, SDB, lori nia naran no igreja Timor-Leste nia naran agradese ba prezensa Xefe Estadu nian hodi hato’o felisitasaun, no nia parte la espera ho desizaun Amu Papa nian bele hili ona sai Kardeál.

“Sentimentu, tanba hau la mehi ba ida-ne’e no la buka. Tan ne’e, rona ida-ne’e, sente hakfodak. Atu dehan loloos de’it, horikalan ha’u susar atu toba, lahatene, buat ruma hosi ne’ebé derrepente de’it,” Don Virgílio espresa nia hanoin.

Iha biban ne’e, Don Virgílio do Carmo kompara nia an hanesan ho Jesus bainhira iha jardin reza molok hahú nia kalvariu.

“Entaun ikus mai to’o iha konkluzaun ha’u sente katak loos Amu Papa la fó ida-ne’e ba ha’u Virgílio maibé nia fó igreja no sarani Timor-Leste. Tanba sarani no igreja Timor-Leste mak merese simu grasa ida-ne’e nu’udar rekuñesimentu ida Maromak halo liu hosi Amu Papa ninian ne’ebé halo tiha ona tinan 500 nu’udar envajelizasaun no komemorasaun restaurasaun independénsia 20 maiu dala 20,” nia dehan.

Tuir komunikasaun, iha 27 agostu tinan ne’e mak Roma sei hala’o serimónia pose kardiál ba Don Virgílio hamutuk ho kardiál na’in-20 sira seluk iha mundu.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here