Arsebispu Arkidioseze Metropolitana Dili, Don Virgílio do Carmo da Silva, SDB. Imajen Tatoli/Dok.

DILI, 30 maiu 2022 (TATOLI)—Parlamentu Nasionál (PN), segunda ne’e, liuhosi reuniaun plenária aprova votu kongratulasaun  númeru 14/2022, ba Arsebispu Arkidiozese Metropolitania Dili, Don Virgílio do Carmo da Silva, SDB, ne’ebé Papa Francisco nomea atu sai Kardeál dahuluk uma kreda Timor-Leste nian.

Notísia Relevante:  Don Virgílio do Carmo da Silva, Kardeál dahuluk Uma Kreda Timor-Leste

“Rezultadu votasaun a-favór 51 no kontra ho abstensaun laiha, nune’e votu kongratulasaun aprovadu. Dala ida tan parabéns ba Don Virgílio do Carmo,” Prezidente Parlamentu Nasionál, Aniceto Longuinhos Guterres Lopes, deklara iha sala plenária.

Vise Bankada Fretilin, Antonino Bianco, hateten agradese ba Maromak tanba bele hili ona Don Virgílio sei sai Kardeál.

“Amu Papa hili ita-nia Amu Bispu sai mós Kardeál agradese ba Maromak sai bibi-atan di’ak nafatin ba Timor-Leste no timor-oan sira, nune’e ita hotu banati tuir Jesus Kristu nia dalan loos ho lian loos iha mundu hamutuk unidu,” nia hateten.

Xefe Bankada CNRT, Duarte Nunes, lori bankada no militante CNRT kongratula Don Virgílio ne’ebé hetan fiar hosi vatikanu atu sai Kardeál.

“Kongratula mós kongregasaun Salesiano ne’ebé iha amu ida durante ne’e iha dedikasaun mai hosi kongregasaun Salesiano no hetan fiar hosi Papa Francisco,” nia dehan.

Tanba ne’e hanoin povu Timor-Leste tomak kontente tanba hetan Timor-oan ida ne’ebé iha privilejiu no kapasidade entaun nomeasaun Kardeál primeiru sai istória ba Timor-Leste.

Deputadu Partidu Demokrátiku (PD0, António da Conceição ‘Kalohan’, hateten povu Timor-Leste maiória katólika sente orgullu tanba loron ida horisehik loron istóriku tebes duni ba Timor-Leste, nune’e hanoin presiza felisita igreja katólika no Dom Virgílio do Carmo ba elevasaun Kardiál nian.

Xefe Bankada UDT, Francisco Favid, lori bankada nia naran hato’o votu kongratulasaun ba Don Virgílio ne’ebé nomea ba atu sai Kardiál ne’e, primeira vez marka istória igreja katólika Timor-Leste iha tinan hirak ne’e.

Bankada Frente Mudansa, Isabel Ximenes, hateten votu kongratulasaun ba família salesiana ne’ebé Amu Bispo Virgílio do Carmo hili entre 21 Kardiál ne’e, Amu Papa fó ita Timor-Leste hetan onra boot ida bele mós simu nomeasaun ida.

“Ami fó votu parabéns ba igreja katólika no sarani tomak no família Salesianp espesiál no ami nia votu susesu Kardiál Don Virgílio do Carmo hodi sai nafatin bibi-atan ba ita sarani Timor tomak,” nia dehan.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here