MTKI no PNUD halo abertura kampu treinamentu kompetisaun negósiu inovovativu II 2022, iha CCD, segunda (30/05). Imajen Tatoli/Francisco Sony

DILI, 30 maiu 2022 (TATOLI)—Governu liuhosi Ministériu Turizmu Komérsiu no Indústria (MTKI) hamutuk ho Programa Nasaun Unida ba Dezenvolvimentu (PNUD) tinan ne’e loke kompetisaun negósiu inovativu, ne’ebé partisipa hosi joven kreativu sira.

Kompetisaun ho tema “Promove Abilidade ba Futuru Harii no Haforsa Empreza Foin-sa’e Sira Hodi Kontribui ba Dezenvolvimentu Ekonomia Sustentável’ ne’e hahú loron 03 maiu no termina 13 maiu 2022, ne’ebé partisipa hosi joven hamutuk 266 hosi munisípiu 12 la inklui Rejiaun Administrativa Espesiál Oé-cusse Ambeno  (RAEOA) no ekipa panel juri halo selesaun dokumentu ba pra-kampu treinamentu hamutuk 51.

Vise-Ministru Turizmu Komérsiu no Indústria, Domingos Lopes Antunes, hateten, Governu no parseiru inisia kompetisaun negósiu inovativu ne’e ho objetivu atu fasilita joven kreativu sira bele hatudu kreatividade ne’ebé iha.

“Ita-nia panel juri kompostu hosi MTKI no PNUD-SEEWAY, avalia tuir prosedimentu ne’ebé rigorozu, imparsiál no konfidensial, tuir rekezitu ne’ebé eziste hodi deside joven na’in-25 mak tama  ba kampu treinamentu,” Vise-Ministru hateten iha salaun Sentru Konvensaun Dili, (CCD, sigla portugés), segunda ne’e.

Notísia relevante: MTKI no parseiru lansa kompetisaun negósiu inovativu ba timor-oan kreativu

Iha fatin hanesan, Project Manager Supporting Entrepreneurship and Employment for Women and Youth (SEEWAY) PNUD, Francelino Guterres, hateten, joven kreativu 25 ne’ebé selesiona, sei tama kampu treinamentu durante loron tolu, hahú ohin to’o 01 juñu 2022, ne’ebé MTKI no PNUD sei hanorin oinsá prepara planu negósiu tuir regra no padraun ne’ebé mak iha.

Joven ne’ebé tama ba kampu treinamentu iha setór agrikultura no peska, indústria, komérsiu, manufatura, turizmu no teknolójia inovasaun ai-han.

“Bainrua ita sei halo semi-finál hosi númeru 25 ne’e, sé mak sei liu ba finál no rezultadu ikus ne’e sei fó sai iha bainrua 01 juñu 2022, ne’ebé sei halo loron tomak,” nia akresenta.

Parte dader sei halo semináriu kona-ba joven emprendedorizmu foin-sa’e ne’ebé sei konvida oradór balun atu partisipa semináriu, nune’e bele fó korajen ka fó apoiu ba setór privadu sira.

“Parte lorokraik sei halo aprezentasaun finál ba ita-nia joven sira ne’ebé tama iha finál, ezemplu na’in-10 mak sei kompete iha finál iha loron 01 juñu lorokraik, ita sei konvida Ministru Turizmu Komérsiu no Indústria, Primeiru Ministru Taur Matan Ruak, no parseiru sira seluk, hafoin sira na’in-10 aprezenta planu negósiu iha bainaka sira-nia oin hodi panel juri deside sé mak sai manán-na’in,” nia hateten.

Governu  prevee apoiu ba joven inovativu sira hamutuk  iha $100.000, manán na’in sei hetan osan hahú hosi $1.000 to’o $10.000, ne’ebé sira sei hetan prémiu iha 02 juñu 2022. 

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here