Ministru Turizmu, Komérsiu no Indústria, José Lucas do Carmo da Silva no Reprezentante PNUD rezidente iha Timor-Leste, Munkhtuya Altangerel, ofisiálmente lansa kompetisaun negósiu inovativu, iha salaun Delta-nova, sesta (17/09). Imajen TATOLI/Egas Cristóvão

DILI, 17  setembru 2021 (TATOLI)–Ministériu Turizmu, Komérsiu no Indústria (MTKI), ho parseria Programa Nasaun Unida ba Dezenvolvimentu (PNUD, sigla portugés) iha Timor–Leste no Instituto de Apoio e Dezenvolvimento Empresarial (IADE) ofisialmente lansa Kompetisaun negósiu inovativu ho tema Haburas emprendimentu inovativu ba rekuperasaun ekonómika’.

Seremónia ne’ebé realiza iha sesta ne’e, iha salaun Delta-nova, mai ho objetivu hosi kompetisaun mak atu enkoraja joven produtivu no kreativu sira ne’ebé ho idea negósiu innovativu, bele kria serbisu ba an liuhosi fortalesimentu emprendedorizmu no ekosistema inovasaun inklui envolvimentu joven sira iha prosesu rekuperasaun ekonómika.

Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristóvão

“Liuhosi programa kompetisaun negósiu inovativu, ekipa juri sei selesiona joven kreativu hamutuk 40 ne’ebé mai hosi munisípiu 12 inklui Rejiaun Administrativa Espesiál Oé-cusse Ambeno (RAEOA), ne’ebé partisipante sira konsentra iha Bootcamp ka semináriu emprezariál ne’ebé sei realiza iha loron 18 – 20 outubru 2021,” refere nota ne’ebé Agência TATOLI asesu sesta ne’e.

MTKI no parseiru sei mellora liután apoiu ba emprezáriu joven liuhosi sentru integradu ne’ebé inovativu no sei akumula programa no instituisaun hotu ne’ebé serbisu relasiona ho emprezariál hanesan Servisu Rejistu no Verifikasaun Emprezariál (SERVE), Kámara Komérsiu Indústria-Timor-Leste (CCI-TL, sigla portugés) liña ministeriál no parseiru dezenvolvimentu sira iha fatin ne’ebé adekuadu ho teknolojia modernu, ne’ebé sei liga mós ho investidór internasionál sira.

Nune’e mós, MTKI no parseiru sei oferese programa inkubasaun negósiu ba joven hamutuk 40, ne’ebé asesu ona ba ekipamentu ne’ebé fornese liuhosi kompetisaun negósiu inovativu

Estabelesimentu inkubasaun negósiu Timor-Leste hanesan espasu ida ne’ebé dezeña atu fasilita emprezáriu timor-oan, liu-liu joven sira ne’ebé mai ho idea negósiu inovativu atu dezenvolve negósiu no fatin hodi joven sira sai emprezáriu susesu.

Notísia relevante: OJE 2022: IADE husu adisionál $480.000 hodi finansia inkubasaun negósiu

Governu nota katak impaktu pandemia COVID-19 no inundasaun foin lalais ne’e, halo Timor-Leste hasoru problema boot no oin-oin, tantu interna no externa, maibé fó oportunidade atu hanoin ba dezenvolvementu ho modalidade foun ne’ebé prioritiza ba dezenvolvimentu sustentável, liu-liu foka ba ema no prosperidade.

Reprezentante PNUD rezidente iha Timor-Leste, Munkhtuya Altangerel. Imajen TATOLI/Egas Cristóvão

Tamba ne’e, iha polítika VIII Governu Konstitusionál, MTKI kria programa kompetisaun negósiu inovativu hodi oferese oportunidade ba joven sira, tantu individuu, grupu no kooperativa ne’ebé mai ho idea negósiu iha setór prinsipál sira hanesan agrikultura no peska, turizmu, indústria no manufatura, teknolojia no inovasaun inklui jestaun ba lixu.

Governu iha esperansa liuhosi  programa prioridade ne’e bele redús taxa dezempregu liuhosi dezenvolvementu setor privadu ne’ebé íniku no inovativu.

Aleinde ne’e, MTKI estabelese ona programa fasilidade garantia kréditu suave (soft loan) hodi fó biban ba mikro, pekena no média empreza ne’ebé foin hahú no eziste atu asesu ba finanseiru iha Nanku Nasionál Komérsiu Timor-Leste (BNCTL) ho juru 3% kada tinan no períodu grasa durante fulan 3-6.

Notísia relevante: MTKI-BNCTL asina akordu ho benefisiáriu garantia kréditu sosiál

Programa ne’e realiza liuhosi serbisu hamutuk entre MTKI, PNUD, BNCTL no IADE.

“MTKI fiar katak joven no empreza mikro, pekena no média mak nu’udar pilar importante hodi kontribui maka’as ba dezenvolvementu no kreximentu ekonomia Timor-Leste, nune’e husu ba ita-boot sira foti oportunidade ne’ebé Governu no parseiru dezenvolvimentu oferese atu dezenvolve di’ak liutén negósiu,” nota hosi MTKI.

Jornalista : Natalino Costa

Editora      : Julia Chatarina

2 KOMENTÁRIU

  1. Hau nudar joven ida iha area rural apresia tebes ho programa Guvernu nian ne’ebe atraves husi Ministru MCI TL..

    Tan nee hau hakarak hatenese “oinsa hau bele applay ba kompetisaun refere”?

  2. Obrigda…..hau husu kona ba hau ho Feto maluk balun. ami foin mk hari Ami nia grupo ou Organizasaun kik ida…maibe iha ami nia Misaun no visaun mk atu formasaun ba joven feto sra la bele Kaben cedu…..ho formasaun formal..no ami nia actividade Agricultura no horikultura agr lao hela…maibe ble ajuda ami h material sra par bele ami halao ami nia actividade ga lae…..

HAKEREK NO HATÁN

Please enter your comment!
Please enter your name here