Membru foun PSHT munisípiu Bobonaro ne'ebe preparadu atu partisipa serimónia graduasaun iha tinan 2022. Imagen Tatoli/Sérgio da Cruz.

BOBONARO, 26 maiu 2022 (TATOLI) – Konselleiru Organizasaun Persaudaraan Setia Hati Terrate (PSHT) Munisípiu Bobonaro, Arlindo de Oliverira, fó-sai katak, membru foun hamutuk na’in-1.057 mak preparadu atu partisipa graduasaun sintu iha tinan 2022.

“Ita-nia alin sira no feton sira-ne’ebé maka prepara atu graduasaun iha tinan 2022, agora hamutuk 1.057 mai hosi  postu administrativu Atabae na’in -79, Balibo na’in-154, Bobonaro 108, Cailaco 79, Maliana 581 no Lolotoe 56,” nia hato’o iha nia intervensaun ba serimónia abertura iha Jináziu Maliana, sesta ne’e.

Tanba ne’e nia dehan ba oin sei esforsu kopera ho autoridade kompetente atu buka meiu oinsá bele fasilita sira realizasaun serimónia graduasaun iha Jináziu Maliana.

Nia husu ba membru hotu ne’ebé espalla iha munisípiu Bobonaro atu kria unidade no amizade ho membru organizasaun arte-marisál sira seluk hanesan Ikatan Kera Sakti (IKS) Kmanek Oan Rai Klaran (KORK) no arte rituál sira seluk.

“Ita ne’e hanesan mau-alin rasik la seluk no la leet ida, tenke respeita ba sira depois sira mós sei respeita mai ita, ita hotu fó kontribuisaun ba nai-ulun sira atu ita-nia povu sira mós bele hanoin ba atu dezenvolve ita-nia rai doben Timor-Leste,” nia husu.

Hatán ba preokupasaun ne’e, Prezidente Sub-Komisaun Reguladora Arte-Marsiál (KRAM) Munisípiu Bobonaro, José Ramos, esplika politikamente governu fó ona legalidade ba GAM tolu ne’ebé eziste iha Timor-Leste, maibé seidauk bele halo ezersísiu tanba seidauk prienxe prosesu administrativu.

Prezidente Sub-KRAM munisípiu Bobonaro, Jose Ramos. Imajen Tataoli/Sérgio da Cruz.

“Ha’u kontente loos rona dehan imi atu graduasaun iha Maliana, maibé imi tenke halo karta submete mai KRAM, PNTL no autoridade sira depois ha’u ba aprezenta iha prezidente karak no Sekretaria Estadu Joventude no Desportu, atu sira aprova nune’e ita bele realiza iha-ne’e, maibé importante liu mak aselera lai kritéria iha tempu badak,” nia katak.

Ramos husu GAM tolu iha Bobonaro tenke hari fali Federasaun Silat Timor-Leste (FESTIL) hafoin KRAM mak regula atubele kompete ho modalidade deportivu sira seluk iha nivél nasionál no bele reprezenta Timor-Leste ba internasionál.

“Arte-marsiál governu re-integra ba komunidade atu sai povu no nasaun nian, ha’u ko’alia maka’as tanba hadomi imi atu la’o iha munisípiu Bobonaro, ami hakarak sai desportu ida-ne’ebé di’ak,” nia hateten.

Istória PSHT eziste iha Bobonaro

Arlindo de  Oliveria, gradua iha 1987 mak ema dahuluk ne’ebé lori organizasaun arte-marsiál PSHT tama iha munisípiu Bobonaro iha loron 24 janeiru 1988. Iha momentu ne’e hala’o ezersísiu ka terinu iha suku Leber, postu amdministrativu Bobonaro.

Konselleiru PSHT Munisípiu Bobonaro, Arlindo de Oliveira. Imajen Tatoli/Sérgio da Cruz.

Hafoin kontinua fali ba suku Oe-leu no espalla ba kapitál Maliana koordena ho ba Padre Parókia Hilario Madeira treinu iha Igreija oin, la’o-tuir dalan Maromak nian.

No tempu ne’ebá tanba situasaun polítika, militár Indonézia kaptura Arlindo ba hatama iha kadeia hahú 1991 to’o 1993 mak foin hetan Liberdade.

Iha momentu ne’ebá membru  Américo no Gilberto ne’ebé halo graduasaun iha 1990 kontinua fali misaun ne’e iha loron 25/05/1991 realiza fali formasaun iha suku Lahomea, postu administrativu Maliana to’o ohin loron prodús ona membru hamutuk na’in-7,500 iha postu administrativu neen munisípiu Bobonaro.

Notisia Relevante:PAM Bobonaro re-abertura ezersísiu arte-marsiál PSHT

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here