Membru foun PSHT halo atrasaun hela iha ámbitu re-abertura organizasaun refere iha Jináziu Maliana. Imajen Tatoli/Sérgio da Cruz.

BOBONARO, 27 maiu 2022 (TATOLI) – Prezidente Autoridade Munisípiu Bobonaro (PAM), Ernesto de Oliveira Barreto, sesta ne’e ofialmente re-abertura ezersísiu organizasaun arte-marsiál Persaudaraan Setia Hati Terate (PSHT) iha munisípiu refere.

Iha ámbitu ne’e selebra mós ezisténsia PSHT ba tinan 100 iha mundu inklui Timor-Leste ho tema “Promovera a ética e sentido patriotismo por meio de garantir a establidade da nossa Nação Timor-Leste” ne’ebé realiza iha Jináziu Munisipál Bobonaro.

Prezidente Autoridade Munisípiu Bobonaro, Ernesto de Oliveira Barreto, agradese ba VII Governu Konstituisonál  lideradu Primeiru Ministru, Taur Matan Ruak no Sekretáriu Estadu Juventude no Desportu (SEJD), Abrão Saldanha, ne’ebé hola inisiativa reativa arte-marsiál.

“Ha’u husu ba oan sira atu promove naran di’ak organizsaaun nian, liuliu iha komunidade tanba tinan ida-ne’e organizasaun hotu hotu hetan ona legalidade, agora faze preparasaun entaun iha tinan oin governu bele loke fali kompetisaun entre organizasaun hotu, depois ida-ne’ebé mak di’ak liu, sei bele ba kompete iha nasional no rai-li’ur, la’ós Tae-Kwon-Do de’it, imi hotu bele,” nia apela.

Prezidente Autoridade Munisípiu Bobonaro Ernesto de Oliveira Barreto, akompaña hosi Komandante PNTL Bobonaro, Superintendente Antoninho Mauluta, Prezidente Konsellu Veteranu Munisípiu Bobonaro, Jaime dos Santos Romão, foto hamutuk ho membru PSHT sira hafoin serimónia re-abertura. Imajen Tatoli/Sérgio da Cruz.

Autoridade munsípiu ne’e husu lideransa másimu PSHT Bobonaro atu kontrola membru sira hodi kria unidade ho grupu arte-marsiál  sira seluk no karik membru balun halo konfrontu tenke iha kapasidade rasik rezolve munisípiu Bobonaro mesak maun-alin de’it.

“Ha’u hakarak hatete de’it ami sira-ne’e katuas ona, depois iha organizasaun sira-ne’e matenek oan barak loos, entaun ita-boot sira mak sei sai futuru ba rai ida-ne’e, entaun tenke hahú agora tau iha ita-nia fuan, tenke haree malu didi’ak, hodi lori ita nasaun ba oin,” nia sujere.

Prezidente Konsellu Veteranu Munisípiu Bobonaro, Jaime dos Santos Romão ‘Dotim’, argumenta arte-marsiál la’ós foin mak eziste iha Timor-Leste, maibé dezde okupasaun Indonézia membru hosi organizasaun balun sakrifika sira-nia aan hodi kontribui ba prosesi luta libertasaun nasionál.

“Ha’u hatene ropa ne’ebé imi hatais iha isin sai lulik tiha ona, maibé oinsá atu lulik ida-ne’e ba oin valór nafatin, ha’u hanesan aman ida husu ba lideransa sira hotu imi mak hamutuk loron kalan iha komunidade nia leet, entaun presiza de’it mak promove pás no establidade atu nune’e Bobonaro sai furak no morin ba beibeik,” veteranu ne’e apela.

Komandante Polísia Nasionál Timor-Leste (PNTL) Munisípiu Bobonaro, Superintendente Antoninho Mauluta, reforsa governu legaliza ona organizasaun arte-marsial nu’udar atividade desportiva, tanba ne’e husu atu koopera ho autoridade seguransa hodi kria pás no establidade iha munisípiu ne’e.

“Ita hotu-hotu hein tanba governu reativa ona, entaun ita hanesan sidadaun Timor-oan tenke hakruuk ba ita-nia lei no despaxu ne’ebé fó-sai ona hodi tane-aas dignidade estadu nian, entaun la’ós ema ida mesak de’it, presiza ita hotu-hotu nia konstribuisaun lori nasaun ba oin,” nia husu.

Konselleiru PSHT Munisípiu Bobonaro, Arlindo de Oliveira, agradese ba governu tanba bele responde ona sira-nia prekupasaun no promete ba oin orienta membru sira kumpre despaixu númeru 12/2022 ne’ebé governu fó-sai ona.

“Ha’u husu apoiu ba ita-nia na’in ulun sira, sivíl ka militár, ita sira iha-ne’e ita hotu nai Maromak haraik mai ita hotu, tanba ne’e sai nu’udar rikusoin ba ita-nia nasaun, alin feto no mane sira-nia talent, ida-ne’e Maromak mak haraik ne’e katak la’ós hamrIik iha lei nia leten maibé iha lei nia okos nune’e ita hotu tenke kuidadu,” Nia afirma.

Partiisipa iha serimónia ne’e Prezidente Sub-Komisaun Reguladora Arte-Marsiál (KRAM), munisípiu Bobonaro, José Ramos, reprezentante hosi Diresaun Nasionál Prevensaun Konflitu Komunitária (DNPKK), líder komunitária suku hitu, perténsia iha postu administrativu Maliana no membru PSHT inklui familia sira.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here