Reprezentante Grupu Arte-Marsiál PSHT halo atrasaun iha ámbitu serimónia reabertura ezersísiu arte-marsiál, iha Jináziu Dili, kinta (26/05). Imajen Tatoli/Francisco Sony

DILI, 26 maiu 2022 (TATOLI)—Governu liuhosi Primeiru-Ministru no Ministru Interiór, Taur Matan Ruak, no Sekretáriu Estadu Juventude no Desportu (SEJD), Abrão Saldanha, inklui reprezentante organizasaun arte-marsiál sira, kinta ne’e, ofisialmente halo reabertura ezersísiu arte-marsiál tolu iha Timor-Leste.

Arte-marsiál tolu ne’ebé loke ezersísiu mak hanesan Ikatan Keluarga Silat Putera Timor-Leste (IKS-PTL), Persaudaraan Setia Hati Terate (PSHT) no Kmanek Oan Rai Klaran (KORK).

Iha biban ne’e, Sekretáriu Estadu Abrão Saladanha, hateten, atividade ne’e hodi evita grupu arte-marsiál sira halo treinu subar ba públiku.

“Governu hakarak serbisu hamutuk ho imi tanba agora la’ós ona tempu ba tuku malu no tebe malu iha dalan, maibé imi prepara-an didi’ak tanba tinan ne’e Governu kria kondisaun no tinan oin imi sei halo kompetisaun,” governante ne’e dehan iha Jináziu Dili.

Notísia relevante: Governu prefere harii sede arte-marsiál tanba kontribui redús konflitu

Sekretáriu Estadu dehan, bainhira Governu kria ona fatin ba arte-marsiál maka grupu sira sei hatudu atitude di’ak hodi lori Timor-Leste nia naran ba mundu liuhosi kompetisaun.

“Horiseik ita-nia atleta na’in-haat hetan prémiu boot hosi rai-li’ur, ne’e hatudu ita-boot sira bele esforsu-an hodi bele bá rai-li’ur liuhosi kompetisaun arte-marsiál. Bainhira Governu kria ona fatin ba imi, mak kontinua baku malu no tuku malu iha dalan hanesan ódiu, di’ak liu imi lalika treinu. Ha’u husu ba imi atu hatudu atitide di’ak nune’e komunidade simu imi ho atitude di’ak, tanba imi-nia doutrina la’ós hanorin imi tuku malu maibé atubele ajuda ema ne’ebé kbiit laiha,” nia hameno.

Aleide ne’e, Governu mós iha ona planu, ba oin atu halo sensu ba arte-marsiál iha Timor-Leste atu hatene totál membru.

Iha biban ne’e, reprezentante grupu arte-marsiál tolu agradese ba Governu ne’ebé fó fali oportunidade ba sira hodi reativa atividade.

“Uluk kedas ami sempre halo kooperasaun ho Goveru, ami hosi PSHT apresia no agradese ba Governu bele autoriza fali ami hala’o ami-nia atividade,” Reprezentante PSHT, João Martins, hateten.

Reprezentante IKS-PTL, Silvestre Sufa, lori grupu ne’e nia naran, agardese mós ba Governu tanba loron ne’e bele halo ona atividade.

“Iha oportunidade ida-ne’e, ha’u husu membru arte-marsiál hotu, maski kór la hanesan maibé ba nasaun ida-ne’e nia di’ak ita tenke hamutuk nu’udár timor-oan kria dame iha rai ida-ne’e,” nia dehan.

Prezidente KORK, António Verdial, agradese ba Governu no husu mós ba membru arte-marsiál hotu atu tau hanoin hamutuk no kria estabilidade.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here