Kondisaun Eskola EBF Mamulak Viqueque, kinta (26/05). Imajen Tatoli/Vitorino Lopes da Costa

VIQUEQUE, 26 maiu 2022 (TATOLI)—Eskola Ensinu Báziku Filiál (EBF) Mamulak, Beloi, postu administrativu Viqueque vila, munisípiu Viqueque, provizóriamente suspende atividade merenda eskolár hodi hein teste amostra hahán ne’ebé estudante sira konsumu.

“Iha kuarta ne’e, bainhira labarik sira han hahán hosi programa merenda eskolár, halo labarik sira kabun moras. Ho nune’e, ami agora  provizóriu suspende atividade merenda eskolár hodi hein rezultadu texte sampel hahán sira ne’ebé konsumu, hafoin maka atividade merenda eskolár la’o filafali,” Koordenadór Eskola EBF Mamulak, Rogeiro Agusto informa ba Agência Tatoli, iha ninia knaar fali, Beloi, kinta ne’e.

Iha loron 25 maiu 2022, estudante na’in-23 hosi Eskola EBF Mamulak baixa iha ospitál internamentu Viqueque hafoin konsumu hahán merenda eskolár.

Notísia relevante: Estudante EBF Mamulak na’in-23 baixa iha ospitál internamentu Viqueque

Tuir Koordenadór eskola, programa merenda eskolár foin implementa iha eskola ne’e durante loron-sia, atu ba loron 10 mak akontese estudante sira kabun moras hodi lori ba fasilidade saúde.

“Dadus estudante hosi EBF Mamulak hamutuk 353, ne’ebé estudante na’in-23 tama ospitál internamentu Viqueque to’o kalan rejista estudante na’in-neen. Ohin dader estudante na’in-ida maka moras tan, ne’ebé ha’u telefone ba ambulánsia mai foti iha Eskola EBF Mamulak totál estudante hamutuk na’in-30, estudante sira ne’ebé hetan moras hosi klase 2 to’o 4 estudante sira ne’e ho idade 9 to’o 11,” nia akresenta.

Nia dehan, estudante na’in-29 ne’ebé halo tratamentu iha internamentu Viqueque iha kuarta ne’e alta hotu ona no daudaun na’in-ida maka sei halo tratamentu.

“Ha’u akompaña estudante na’in-29 to’o kalan maibé kuaze alta hotu ona. Na’in-ida ohin dadeer ambulánsia tula ba maka sei iha internamentu. Estudante sira ne’ebé baixa, daudaun ne’e seidauk tuir aula prezensiál, maski alta ona, maibé daudaun sira sei iha uma bainhira estudante sente saúde di’ak ona maka sei mai tuir aula,”  nia haktuir.

Estudante EBF Mamulak bainhira atu konsumu hahán merenda eskolár, sira fase liman mak simu hahán hodi han tanba eskola iha bee.

“Inan-amam mai hasoru ha’u dehan estudante sira bele tama filafali aula ka oinsá, maibé ha’u dehan ba inan-aman. Bainhira estudante kondisaun seidauk di’ak karik lalika tuir aula lai, bainhira estudante sira-nia saúde di’ak lai maka mai tuir aula,” Koordenadór dehan.

Oráriu ba programa merenda eskolár iha eskola ne’e, hahú sengunda to’o kinta estudante sira han etu ho modo, sesta maka estudante sira konsumu kolak.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here