Estudante sira tau hela soru iha ospitál internamentu Viqueque, ho akompañamentu hosi inan-aman no pesoál saúde, kuarta (25/05). Imajen Tatoli/Vitorino Lopes da Costa

VIQUEQUE, 25 maiu 2022 (TATOLI)–Estudante Eskola Ensinu Báziku Filiál (EBF) Mamulak, postu Viqueque vila hamutuk na’in-23, kuarta ne’e, maizumenus tuku 15:45, baixa iha ospitál internamentu tanba deskonfia kauza hosi konsumu hahán merenda eskolár.

“Ohin ami simu estuande EBF Mamulak hamutuk na’in-23 feto hotu, estudante sira-ne’e kazu hosi konsumu hahán merenda eskolár. Ami fó atendementu ona no konsege monta soru. Estudante sira hato’o katak sente kabun kidun moras no kotuk laran moras,” Doutora Servisu Internamentu Viqueque, Hermigildo Pereira, hateten ba Agência Tatoli, hafoin fó tratamentu ba estudante sira, iha ospital internamentu Viqueque.

Notísia relevante: Saúde Viqueque sei prepara menu hodi re-ativa merenda eskolár

Tuir nia, kondisaun jerál estudante sira di’ak, maibé pesoál saúde sira kontinua tau-matan hodi haree kondisaun estudante sira ba oin.

“Estudante sira ho kondisaun di’ak tanba ita tau soru hotu, estudante balun la reklama kabun moras ona, maibé ita sei haree estudante sira ne’e tanba sira tama kategoria observasaun no ami seidauk oferese ai-moruk ruma,” nia akresenta.

Aleinde ne’e, ekipa Analista Laboratóriu foti ona amostra hahán ne’ebé estudante sira konsumu iha Eskola EBF Mamulak no sei lori halo teste iha laboratórium nasionál.

“Agora hein rezultadu, hafoin analista sira halo analiza, karik kauza hosi hahán ka hosi buat seluk, ita hein rona rezultadu,” nia tenik.

Iha fatin hanesan, Diretór Servisu Edukasaun munisípiu Viqueque,  Emídio Amaral, haktuir, hafoin rona akontesimentu ne’e, nia parte ba konfirma iha eskola.

“Iha momentu akontese, ha’u bá kedas haree ema sira ne’ebé prepara hahán merenda eskolár no husu sira hahán ne’e tein, hafoin eskola tama tiha, estudante tama lokraik maka hetan moras ne’e. Purtantu parte saúde sira ba foti ona amostra hahan, ita hein de’it rezultadu,” nia hato’o.

Hahán sira ne’ebé estudante sira konsumu iha kuarta ne’e mak hanesan koto, modo mostarda no etu.

“Parte laboratóriu rekolla bee, masin, modo inklui ema-nia muta sira. Hosi sampel sira-ne’e durante 24 oras nian laran ita tenki lori ba Dili. Ida-ne’e bele dehan keracunan,” nia dehan. 

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here