DILI, 25 maiu 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova alterasaun orgánika Polísia Nasionál Timor-Leste (PNTL), ne’ebé aprezenta hosi Primeiru-Ministru no Ministru Interiór, Taur Matan Ruak.
“Reestruturasaun orgánika PNTL ne’e ho objetivu atu adekua kapasidade resposta ba dezafiu nasionál no internasionál atuál, hadi’a kondisaun funsionál no operasionál, iha aliñamentu ho Planu Estratéjiku Dezenvolvimentu (PED) tinan 2011-2030, kona-ba konseitu estratéjiku defeza no seguransa nasionál inklui programa VIII Governu Konstitusionál,” Ministru Prezidénsia Konsellu Ministru, Fidelis Manuel Leite Mangalhães, relata, hafoin reuniaun ezekutivu, iha Palásiu Governu.
Notísia relevante: Vise MI submete ona proposta rekrutamentu ajente PNTL foun ba PM
Revizaun lei orgánika PNTL adota modelu organizasionál ida tuir irárkia, integradu ba nível komandu tolu, hanensan nível superiór ida ho kargu Komandante Jerál ne’ebé hetan apoiu hosi Segundu Komandante Jerál, nível intermédiu ida hanesan Komandu Operasionál, Komandu Administrasaun no Komandu Pesoál.
Nível seluk mak konstitui hosi Komandu Munisipál sira, inklui Komandu Munisipál Ataúro ne’ebé foin kria inklui Komandu Rejiaun Administrativa Espesiál Oé-cusse Ambeno (RAEOA).
Prevee mós funsionamentu pozisaun irárkika ne’ebé hanesan hosi Komandu Rejionál no Komandu Munisipál sira, Institutu Superiór Siénsia Polisia no Unidade Espesiál Polísia, ne’ebé sei simu kompeténsia iha área espesialidade polisiál ba nível nasionál.
Jornalista : Arminda Fonseca
Editora : Julia Chatarina
