Produtu lokál iha bazar tradisionál Dili, sesta (16/10). Imajen TATOLI/António Gonçalves.

VIQUEQUE, 03 maiu 2022 (TATOLI)-Diretór serbisu edukasaun munisipál Viqueque, Emidio Amaral, informa programa implementasaun merenda eskolár ba estudante sira, parte saúde sei prepara menu hodi re-ativa iha semana ne’e.

“Ami foin lalais partisipa enkontru iha nasionál hamutuk ho administradór munisípiu Viqueque no parte saúde sira. Nune’e menu ba programa merenda eskolár saúde agora daudaun sei prepara hela, iha semana ne’e sira entrega ba edukasaun maka ita foin implementa”, Emidio Amaral ba jornalista Agência Tatoli iha adiministrasaun munisípiu Beloi, tersa ne’e.

Emidio esplika, programa merenda eskolár sei la’o tuir mata-dalan hosi Ministériu Adiministrasaun Estatal  (MAE), katak estudante sira tenki han hahán ne’ebé nutrítivu ba estudante sira.

“Merenda eskolár ita implementa sei la’o tuir menu sira ne’ebé parte saúde fó, ita sei la implementa menu harbiru, ha’u fó ezemplu eskola sira iha Iraler, posti Uatulari dook hosi tasi ikan laiha, ita uza fali seluk”, nia hato’o.

Nia dehan, menu merenda eskolár tinan kotuk nian troka ona agora daudaun menu foun fali, tanba ne’e maka sei hein menu hosi parte saúde hafoin bele implementa.

“Menu uluk ne’e iha, maibé troka ona ne’ebé agora daudaun implementa merenda eskolár menu foun. Tan  ne’e, ita sei hein menu foun ne’ebé maka parte saúde sira prepara, semana ida ne’e saúde fó menu ita bele implementa ona,  tanba orsamentu aloka ona ba eskola sira nian konta bankaria”. nia  relata.

Tuir Orsamentu ba programa merenda eskolár ba tinan 2022 munisípiu Viqueque aloka orsamentu hamutuk $91.000 hodi implementa programa merendade eskolár.

Kona-ba kontrolu merenda eskolár, nia dehan, programa merenda eskolár implementa hosi MAE no inspetór edukasaun sira maka sei halo kontrolu. Nune’e sira bele kontrola orsamentu ne’ebé aloka ba eskola sira, bainhira eskola sira la ezekuta orsamentu merenda eskolár sei fila fali ba kofre Estadu.

Notísia relevante: Administrasaun Viqueque aloka ona orsamentu $91.000 ba programa merenda eskolár

Jornalista       : Vitorino Lopes da Costa

Editora           : Rita Almeda

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here