Prezidente Konsellu Diretivu Agência Tatoli, I.P, Manuel Pinto no ekipa halo vizita traballu ba Gabinete Administradór munisípiu Viqueque, Januário Soares ‘Bolly’, iha Administrasaun munisipál, Viqueque vila, kuarta (25/05). Imajen Tatoli/Joanico Araújo

VIQUEQUE, 25 maiu 2022 (TATOLI)—Prezidente Konsellu Diretivu Agência Tatoli, I.P, Manuel Pinto, akompaña ho Vise-Prezidente Asuntu Mídia no Jornalístiku, Xisto Freitas Piedade, no ekipa, kuarta ne’e, hasoru malu ho Administradór munisípiu Viqueque, Januário Soares ‘Bolly’ hodi ko’alia kona-ba kooperasaun serbisu.

Biban ne’e, Autoridade munisipál ne’e apresia ho prezensa ekipa inklui ezisténsia mídia estatál nu’udar meiu ba komunidade hodi hato’o preokupasaun no relata kondisaun iha baze.

“Dahuluk, ha’u agradese ba prezensa Agência Tatoli, I.P iha munisípiu Viqueque hodi fahe informasaun ba ita-nia komunidade, ha’u hanoin mídia ne’e importante tebes. Tanba ne’e, ohin Prezidente Agência Tatoli, I.P ho ninia ekipa mai hasoru ha’u hodi loke espasu harii edifísiu iha munisípiu Viqueque,” Administradór hateten ba jornalista Agência Tatoli, hafoin ramata enkontru, iha ninia knaar fatin, Administrasaun munisipál, Viqueque vila.

Notísia relevante: Governu iha obrigasaun kria kondisaun ba Tatoli,I.P

Nune’e, Jerente Agência Tatoli, I.P sei haruka karta ofisiál ba administrasaun munisípiu Viqueque hodi hato’o intensaun no parte Administradór prontu fasilita.

“Ha’u ohin hateten ona Prezidente hodi submete karta pedidu hodi husu fatin mai munisípiu, hafoin ami enkamiña ba Terra Propriedade munisípiu Viqueque hodi halo prosesu, ba futuru estabelesimentu edifísiu Agência Tatoli, I.P iha munisípiu Viqueque,” nia akresenta.

Tuir Januário Soares, propriedade Estadu iha rejiaun ne’e barak, maibé daudaun ne’e komunidade maka okupa, tanba ne’e atu liberta espasu ne’ebé hanesan propriedade Estadu presiza halo negosiasaun.

“Ha’u hanoin fatin iha, maibé ita presiza halo negosiasaun ho okupante sira, administrasaun nian maka ita problema, tanba munisípiu laiha orsamentu rezerva ida hodi ita fó indemnizasaun ba okupante sira. Karik Agência Tatoli, I.P iha posiblidade no ita sei fó informasaun hodi fasilita kontaktu ho okupante propriedade Estadu liu diresaun Terra Propriedade,” Administradór dehan.

Iha fatin hanesan, Prezidente Agência Tatoli, I.P, Manuel Pinto, hateten, enkontru ne’e hodi hato’o kestaun rua.

“Ohin ami mai audiénsia ho Administradór ho objetivu hakarak agradese ba Administradór tanba fó ona espasu ba jornalista Agência Tatoli iha Viqueque hodi hala’o serbisu, daruak ami husu administrasaun munisipál ne’e hodi halo identifikasaun fatin Estadu sira inklui rekezitu sira oinsá ita bele hetan hodi harii edifísiu Tatoli iha Viqueque,” Manuel Pinto informa.

Nune’e, rezultadu enkontru ne’e pozitivu tanba tuir esplikasaun Administradór katak rai Estadu barak hela, maibé presiza halo identifikasaun hodi informa hikas ba Jerente mídia estatál ne’e.

“Ami agradese  tebes ba Administradór tanba koopera di’ak tebes ho Agência Tatoli, I.P. Ami iha esperansa ida katak tinan ne’e nia laran bele hetan espasu iha Viqueque hodi fasilita serbisu jornalista Agência Tatoli, I.P,” nia realsa.

Iha loron 27 maiu 2021, Konsellu Diretivu Agência Tatoli, I.P destaka jornalista lima ba munisípiu Viqueque, Baucau, Covalima, Bobonaro no Rejiaun Administrativa Espesiál Oé-cusse Ambeno (RAEOA), ne’ebé antes ne’e liu ona prosesu rekrutamentu, hodi halo kobertura iha rejiaun no divulga informasaun.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here