Selebrasaun aniversáriu Tatoli,I.P ba dala-lima (5) ho tema: ‘Papél Tatoli,I.P ba susesu eleisaun Prezidensiál 2022’, iha edifísiu Faról, sesta (30/07/21). Imajen Tatoli/Francisco Sony.

DILI, 30 jullu 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten Governu iha obrigasaun atu kria kondisaun ba Agência Noticiosa de Timor-Leste, Institutu Públiku (Tatoli,I.P), hodi bele hala’o knaar ho di’ak.

“Tatoli hanesan Agência estatál ne’ebé, nune’e Governu iha obrigasaun atu hamriik iha sorin hodi kria kondisaun hotu-hotu, nune’e bele ezerse funsaun loloos tuir Lei Komunikasaun Sosiál no mós Konstituisaun artigu 40 no 41, kona-bá liberdade espresaun no liberdade imprensa,” Francisco Jerónimo, hateten iha ámbitu aniversáriu Tatoli,I.P nian ba dala-V, ne’ebé hala’o iha edifísiu Faról, sesta ne’e.

Notísia relevante:Fatór determinante ba futuru Tatoli,I.P depende ba produtu ohin-nian

Governante ne’e kompromete katak, MAPKOMS sei la halo intervensaun iha atividade jornalizmu iha kontestu editoriál no mós iha asesu hotu-hotu ne’ebé Agência ne’e hala’o.

Francisco Jerónimo mós rekoñese katak, durante ne’e Agência Tatoli,I.P iha difikuldade barak liuliu atu haree ba futuru oinsá ezerse liberdade no serbisu di’ak liu, iha preparasaun ba aleisaun Prezidensiál, presiza duni orsamentu sufisiente.

Nia lori Ministériu no Governu nia-naran hato’o parabens ba Tatoli,I.P ne’ebé halo tinan ba da-V, durante tinan lima hala’o kna’ar bele dehan book-an daudaun la’o ba oin, atu bele realiza mehi instituisaun-nian.

Espetativa Estadu no Governu maka, Tatoli,I.P presiza iha neutralidade ba kobertura, nune’e bele oferese informasaun loloos ba públiku.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here