DILI, 24 maiu 2022 (TATOLI)--Sekretáriu Estadu Formasaun Profisionál no Empregu (SEFOPE), Alarico de Rosário, akompaña hosi Embaixadór Austrália, Bill Costelo, tersa ne’e, halo abertura workshop kona-ba Timor-Leste Labour Mobility Partnership.
Tuir Sekretáriu Estadu, objetivu importante hosi atividade ne’e mak halibur hamutuk ho parseiru xave sira ne’ebé envolve iha implementasaun programa Pacific Australia Labour Mobility (PALM), hodi ko’alia no aseita hamutuk planu prioridade implementasaun programa.
“Daudaun ne’e SEFOPE liuhosi Diresaun Nasionál Empregu Exterior (DNEE) haruka joven timor-oan ba serbisu iha rai-li’ur hanesan Austrália no Koreia Sul, maibé iha planu sei haruka tan ba serbisu iha Japaun, Canadá, Irlanda, no nasaun sira ne’ebé ita iha ona konkordánsia,” governante informa iha Maubara Room, Timor-Plaza, tersa ne’e.
Notísia relevante: SEFOPE haruka tan traballadór timor-oan 87 serbisu iha Koreia Súl
Durante atividade, SEFOPE aprezenta planu estratejia hosi DNEE, ne’ebé atu prepara joven timor-oan sira ba serbisu iha Austrália liuhosi programa PALM ho durasaun kontratu fulan-sia to’o tinan-tolu.
Iha fatin hanesan, Diretór Diresaun Nasionál Empregu Exteriór, Filomeno Soares, dehan, tuir planu mobilizasaun traballadór, kada tinan Governu sei haruka 1.500 to’o 2.500, bazeia ba demanda ne’ebé empregadór presiza.
“Maibé atu atinje mehi ne’e, persiza serbisu hamutuk ho Embaixada Austrália iha Timor-Leste inklui ajénsia internasionál sira hanesan Department of Foreign Affairs and Trade (DFAT) no Pacific Labour Facility (PLF),” nia tenik.
Diskusaun lubuk ne’ebé Timor-Leste halo hamutuk ho Governu Austrália liuhosi DFAT iha tempu hirak liubá iha konkordánsia atu kria kritéria foun hanesan traballadór timor-oan ne’ebé ba serbisu iha Austrália la liuhosi ona PLS no SWP tanba programa rua ne’e tama hotu ona ba DFAT.
“Ita asina akordu iha fulan hirak liubá no ita aplika DFAT ne’e hahú iha 04 abril 2022. Nune’e, liuhosi workshop SEFOPE husu ba DFAT hodi haree ba mitigasaun risku, liuliu traballadór sira ne’ebé ses hosi sistema, rekomenda ba DFAT atu husu ba trabaladór sira ne’ebé uza viza protesaun, na’in rasik kansela tanba durante sira uza viza protesaun polísia imigrante mós labele kaer sira,” nia dehan.
Parseiru xave sira ne’ebé envolve iha implementasaun programa PALM mak hanesan, SEFOPE liuhosi DNEE, DFAT no PLF.
Jornalista : Arminda Fonseca
Editora : Julia Chatarina
