Labarik sira kumprimenta Prezidente Repúblika Portugál, Marcelo Rebelo de Sousa, hafoin ramata serimónia isár bandeira hodi komemora loron restaurasaun independénsia Timor-Leste ba dala-XX, iha Palásiu Prezidensiál Nicolau Lobato, Bairru Pite, Dili, sesta (20 maiu 2022). Imajen Tatoli/Francisco Sony.

DILI, 20 maiu 2022 (TATOLI)—Prezidente Repúblika períodu 2022-2027, José Ramos Horta, sesta ne’e, konvida labarik sira-ne’ebé akompaña serimónia ne’e kumprimenta nia no Prezidente Repúblika Portugál, Marcelo Rebelo de Sousa, hafoin ramata isár bandeira komemora loron restaurasaun ba dala-XX.

Notísia Relevante: PR Horta: Timor-oan orgullu komemora loron restaurasaun independénsia

“Ha’u konvida labarik kiik sira iha ne’e atu mai iha oin hodi fó kumprimenta ba Prezidente Repúblika Portugál, Marcelo Rebelo, no Governadór Jerál Austrália,” Horta konvida labarik sira-ne’ebé asiste hela komemorasaun loron 20 maiu iha edifísiu Palásiu Prezidensiál Nicolau Lobato, Bairru Pite, sesta ne’e

Labarik lubun ne’ebé ho idade 13 mai kraik la’o ho forma hakat kedas ba iha fatin Verry Important Person (VIP) nian ho oin hamnasa no ksolok, hodi kumprimenta direta PR foun, Prezidente Portugál no Governadór-Jerál Austrália.

Jestu Prezidente Repúblika, José ramos Horta, konvida labarik sira perante iha bainaka espesiál hotu nia oin ne’e, nu’udar sinál esperansa ba labarik sira iha Timor-Leste.

Laureadu Prémiu Nobel da Paz ne’e promete nia mandatu sei loké jardin prezidensiál pertense ba labarik iha Palásiu Prezidensiál Nicolau Lobato, Bairru Pite, hodi bele asesu no sei tau internet iha jardin nune’e joven sira bele asesu.

Nune’é mós, Horta sei promove igualidade jéneru 50% entre feto no mane iha palásiu prezidensiál, kria departamentu ba sosiedade sivíl kona-ba defisiénsia, komunidade Lesbian Gays Bisexuals Intersexual (LGBTI) haree sira hanesan no kontinua programa sosiál ne’ebé prezidensiál halo ona.

Notísia Relevante: PR Horta: “Ha’u-nia odomatan loke ba diskusaun buka dalan konsensu nasionál”

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here