Korpu Isár Badeira iha ambitu komemoraun loron restaurasaun independénsia Timor-Leste ba dala-XX, iha Palásiu Prezidensiál Nicolau Lobato, Bairru Pite, Dili, sesta (20 maiu 2022). Imajen Tatoli/Francisco Sony.

DILI, 20 maiu 2022 (TATOLI)—Prezidente Repúblika, José Ramos Horta, hateten nu’udar timor-oan sente orgullu ba komemorasaun loron restaurasaun independénsia Timor-Leste ba dala-XX (20 maiu 2022-20 maiu 2022.

Notísia Relevante: PR Horta: “Ha’u-nia odomatan loke ba diskusaun buka dalan konsensu nasionál”

Prezidente Repúlika períodu 2022-2027, José Ramos Horta, halo pasa revista ba formatura F-FDTL no PNTL iha komemoraun loron Restaurasaun independénsia Timor-Leste ba dala-XX, iha Palásiu Prezidensiál Nicolau Lobato, Bairru Pite, Dili, sesta (20 maiu 2022). Imajen Tatoli/Francisco Sony.

“Orgullu ita timor-oan ohin selebra loron restaurasaun independénsia. Ha’u hakruuk ba éroi sira-ne’ebé mate ona hanesan Nicolau Lobato, Francisco Xavier Amaral ho sira seluk no sira -ne’ebé moris hanesan Xanana Gusmão, Taur Matan Ruak no Francisco Guterres Lú Olo,” PR Horta hateten iha diskursu iha komemorasaun loron restaurasaun independénsia ba dala-XX, iha Palásiu Prezidensiál Nicolau Lobato, Bairru Pite, Dili, sesta ne’e.

Horta agradese tanba iha tempu luta sempre hamutuk ho apoiu soliedariedade internasionál to’o harii independénsia hodi konstrui Estadu ho apoiu sistema Nasaun Unida nian.

Xefe Estadu ne’e re-afirma, relasaun tenke dinámiku tanba Timor-Leste sei hametin liután relasaun diplomátika ho nasaun viziñu, relasaun bilaterál, multilarál iha mundu.

“Ita-nia polítika ba oin kontinua diplomasia orienta ita buka amigu, laiha inimigu. Ita fó prioridade ba nasaun vizíñu Indonésia, Austrália, Nova Zelandia no fó importánsia ba relasaun internasionál iha rejiaun ASEAN, Uniaun Europeia no hametin relasaun bilaterál ho rai sira iha ASEAN no hametin relasaun ho Korea do Sul no Japaun. Ita sei halo relasaun ho Nasaun Unida iha área oioin ho mós haree programa Millennium Challenge Corporation (MCC, siglá inglés) ne’ebé Nasaun Unidu apoia,” nia hateten.

Nune’e, Xefe Estadu ne’e lori Estadu nia naran agradese  ba prezensa Prezidente Portugál, Primeiru-Ministru Guine Bissau, konvidadu enviadu espesiál, reprezentante nasaun sira iha mundu, embaixadór sira, órganizasaun multilaterál no sira seluk ne’ebé iha komemorasaun 20 maiu no serimónia investidura PR nian.

Iha parte seluk, Horta mós agradese partisipasaun partidu polítiku hotu iha prosesu demokrásia hahú iha 2002 to’o daudaun ne’e.

Nia konpromete, durante mandatu sei buka diálogu lidér nasionál hotu, Parlamentu Nasionál, sosiedade sivíl, akademiku  no oinsá hametin parseiru ho igreja hodi lori dezenvolvimentu nasaun ba oin, oinsá haree prioridade sira seluk hanesan edukasaun, saúde agrikultura, serguransa alimentár, kombate malnutrisaun, tranzisaun jerasionál, haree  dezenvolvimentu hosi Oé-Cusse to’o ba Covalima.

Nia kompromete sei explora hametin relasaun ho Provinsia Nusa Tengara Timur (NTT)-Indonézia atu haree dezenvolvimentu ne’ebé la’o daudaun besik iha fronteira.

Enkuantu iha serimónia komemorasaun loron restaurasaun independénsia ba dala-XX partisipa hosi Primeiru-Ministru, Taur Matan Ruak, Prezidente Parlamentu Nasionál, Aniceto Longuinhos Guterres Lopes, Prezidente Tribunál Rekursu, Deolindo dos Santos.

Prezidente Repúblika Sesante, Francisco Guterres Lú OLo, eis titulár órgaun soberania, membru VIII Governu Konstituisionál, Prezidente Portugál, Marcelo Rebelo de Sousa, Primeiru-Ministru Guine Bissau, konvidadu espesiál, korpu diplomátiku no populasaun sira. 

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here