Administradór munisípiu Viqueque, Januário Soares ‘Boly’. Imajen Tatoli/Vitorino Lopes da Costa

VIQUEQUE, 20 maiu 2022 (TATOLI)–Administradór munisípiu Viqueque, Januário Soares ‘Boly’, konsidera presiza esforsu hosi entidade hotu hodi aselera dezenvolvimentu nasionál tanba prosesu dezenvolvimentu la’o tarde, maski tama ona tinan 20 restaurasaun independénsia.

“Ha’u haree liga ba planu estratéjiku dezenvolvimentu durante tinan 20, ita seidauk halo buat barak tanba ita seidauk atinje planu estratéjiku dezenvolvimentu nian. Dala ruma ita la’o ho impase polítika mak provoka karik, tanba ne’e dezenvolvimentu sai tarde liu,” Autoridade Viqueque hateten ba Agência Tatoli, iha ninia knaar fatin, Administrasaun Viqueque, sesta ne’e.

Nia nota katak, maski setór hotu la’o tarde, maibé dezenvolvimentu parte eletrisidade iha munisípiu Viqueque atinje 90%, ne’ebé maioria komunidade asesu ona eletrisidade.

“Presiza esforsu liután hodi dezenvolvimentu tuir planu estratejiuku dezenvolvimentu 2011-2030. Iha setór agrikultura komunidade Timór  ita bele dehan maioria 75% hanesan agrikultór, maibé daudaun dezevolvimentu iha setór ne’e la’o seidauk di’ak. Ita-nia joven barak maka halai ba sidade, hela katuas de’it maka kontinua halo to’os, nune’e produsaun agríkola menus,” nia hato’o.

Nune’e, nia husu joven sira ne’ebé la kontinua estudu iha suku sira presiza hamutuk inan-aman sira hodi hadi’a setór agrikultura hodi bele la’o ho di’ak.

“Iha setór agrikultura ita bele hetan osan hotu, maibé ita-nia komunidade seidauk konsiente didi’ak, liu-liu ita-nia joven sira. Oras ne’e, iha munisípiu Viqueque eko-agro  turizmu iha Raitahu bainhira hatudu ninia rezultadu pozitivu, ha’u hanoin ita-nia joven sira mós sei dedika-an ba setór agrikultura,” nia akresenta.

Notísia relevante: MAP Viqueque sei kolleta produtu agríkola iha área Raitahu

Administradór dehan, setór infraestrutura iha munsípiu Viqueque la’o tarde liu, maibé ekipa téknika sira kontinua halo levantamentu dadus.

“Espera tinan oin bele hadi’a estrada liga bá nasionál no munisipál iha munisípiu Viqueque. Estrada hosi  Asalaitula to’o Larigutu sei responsável hosi kompañia Xina,  Larigutu to’o merkadu Ossu kompañia Uacae, Merkadu Ossu to’o Viqueque sei kaer hosi kompañia Xina. Espera katak serbisu bele la’o di’ak, nune’e komunidade Viqueque bele goja estrada ne’ebé di’ak,” nia realsa. 

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here