Prezidente Repúblika períodu 2022-2027, José Ramos Horta, asina termu pose, durante serimónia investidura, iha Tasi-tolu, kinta (19/05). Imajen Tatoli/António Daciparu

DILI, 19 maiu 2022 (TATOLI)–José Ramos Horta ofisialmente simu pose nu’udar Prezidente Repúblika (PR) ba períodu 2022-2027, iha kinta ne’e, tuku 23:45 kalan, iha Tasi-tolu.

“Ha’u promete ba ha’u-nia an, iha momentu sira tomak, atu sai Prezidente Repúblika ba timor-oan sira hotu, sein iha dúvida ka subterfújiu sira. Ha’u la reprezenta de’it sira ne’ebé vota ba ha’u, maibé timor-oan sira ne’ebé hamutuk ho ha’u partilla domin ba rai ida-ne’e no ba ita-nia istória eziste iha ha’u-nia hanoin,” Horta hato’o diskursu hafoin simu pose.

Prezidente Repúblika períodu 2022-2027, José Ramos Horta, lee termu pose, durante serimónia investidura, iha Tasi Tolu, kinta (19/05). Imajen Tatoli/António Daciparu

Aleinde ne’e, Horta kompromete mós atu defende no kumpre Konstituisaun Repúblika Demokrátika Timor-Leste (RDTL). 

“Ha’u kompromete atu defende, kumpre no haruka kumpre Konstituisaun hanesan guardiaun permanente no atentu ba lei fundamentál inklui nia valór sira refleta nasaun ne’ebé ita hili atu moris ba,” nia tenik.

Notísia relevante: TR anúnsia Horta sai PR eleitu ba periodu 2022-2027

Aleinde ne, nu’udar Prezidente Repúblika, Horta atu halo buat hotu bazeia ba prinsípiu salva-guarda valór ne’ebé konsagra iha Konstituisaun, iha protesaun ba liberdade hosi hanoin, fiar, espresaun no pluralizmu ba opiniaun, hodi luta liután ba justisa sosiál, defeza ba valór sira idéntiku ho identidade nasionál, ne’ebé hatuur abut iha eroízmu, no imajináriu-majíku, iha simplisidade, iha hakraik-an, laran-luak, abertura, sentidu inkluzaun no fiar maka’as hosi povu  Timor-Leste. 

Serimónia solene ne’e hahú iha kalan tuku 22:00, ne’ebé hahú ho sesaun plenária prezide hosi Prezidente Parlamentu Nasionál, Aniceto Longuinhos Guterres. 

Prezidente Repúblika, Ramos Horta to’o iha fatin serimónia kuaze tuku 23:00 kalan, ne’ebé simu hosi Presidente Parlamentu Nasionál. 

Prezidente Repúblika períodu 2022-2027, José Ramos Horta, kompromenta Prezidente Repúblika sesante, Francisco Guterres ‘Lú Olo’ durante serimónia investidura, iha Tasi-tolu, kinta (19/05). Imajen Tatoli/António Daciparu

Enkuantu, Prezidente Repúblika sesante, Francisco Guterres ‘Lú Olo’ akompaña hosi Espoza, to’o iha fatin serimónia iha tuku 22:16 kalan.

Hafoin ida-ne’e, Prezidente Repúblika, Ramos Horta halo juramentu no kontinua kedas ho kanta hino nasionál. 

Nune’e, hakat liu ho diskursu hosi Prezidente Repúblika sesante no Sekretaria Parlamentu Nasionál lee akordaun hosi Tribunál Rekursu no rezultadu eleisaun nian. 

Prezidente Repúblika períodu 2022-2027, José Ramos Horta. Imajen Tatoli/António Daciparu

Iha eleisaun prezidensiál segunda volta iha loron 19 abril 2022, hatudu rezultadu, José Ramos Horta ho votu 397.145 (62,09%) no Francisco Guterres ‘Lú Olo’ ho votu 242.440 (37,91%).

Sentru votasaun estabelesidu iha territóriu tomak 1.200, totál eleitór 859.925, ema ne’ebé tuir vota 646.389, votu válidu 640.967 (99,16%), branku 1.643 (0,25%), nulu 3.734 (0,58%), no rejeitadu 28 (0,00%), abandonadu 15.

Antes ne’e, iha loron 23 janeiru 2022, liuhosi konferénsia nasionál partidu Congresso Nacional de Reconstrução de Timor (CNRT), konfrensista sira deside fó apoiu ba Horta kompete iha eleisaun prezidensiál tinan 2022, maski Horta rasik la’ós kuadru partidu.

Hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here