Kandidatu Prezidente Repúblika períodu 2022-2027 ho númeru sorteiu 14, Jose Ramos Horta. Imajen/Argentina Cardoso.

DILI, 29 abríl 2022 (TATOLI)-Tribunál Rekursu (TR), sesta ohin,  fó sai ona rezultadu verifikasaun no validasaun ba rezultadu  eleisaun Prezidensiál segunda volta hodi legaliza José Ramos Horta maka eleitu ba Prezidente Repúblika periodu 2022-2027 ho votu 398.028 (62,1%).

Prezidente Tribunál Rekursu, Deolindo dos Santos, hateten durante Tribunál ninia prosesu verifikasaun no validasaun ba akta apuramentu husi eleisaun prezidensiál segunda volta la identifika mosu irregularidade tanba ne’e TR deklara no proklama ba públiku katak  kandidatu PR, José Ramos Horta maka eleitu.

Notísia Relevante :CNE submete ona rezultadu ELPREZ segunda volta ba TR

Tribunál Rekursu simu akta apuramentu eleisaun prezidensiál segunda volta ne’e, iha kinta (28/04/2022) hodi verifika no halo validasaun ba dokumentu ne’e.

“Tribunál Rekursu deside no proklama rezultadu eleisaun segunda volta ne’ebé halo iha loron 19 marsu, kandidatu Prezidente Repúblika ho númeru sorteiu ida,  José Ramos Horta  maka sai vensedór ba eleisaun Prezidente Republika  2022-2027 no Prezidente eleitu 2022-2027 ,” Prezidente TR,  Deolindo dos Santos, hateten iha sala audénsia Tribunál Rekursu, Caicoli, Dili.

Kandidatu Prezidente Repúblika Francisco Guterres Lú Olo hetan votu hamutuk 242. 239 ekivale ba (37,9 %).

“Ho desizaun ida ne’e ita-nian Prezidente Repúblika eleitu no Prezidente Repúblika ba 2022-2027 iha ona no ida ne’e bele sai Prezidente ba  ita hotu,” nia dehan.

Iha biban ne’e, Prezidente Tribuál Rekursu mós kongratula Instituisaun  entidade hotu-hotu hanesan STAE, CNE, observadór internasionál husi Uniaun Europeia, seguransa PNTL, F-FDTL, autoridade komunitaria no povu hotu tanba fó kontribuisaun hodi realiza eleisaun prezidensiál  ho susesu tanba la’o iha ambiente páz no hakmatek.

Entertantu  totál eleitór hamutuk 859..925. ema ne’ebé tuir vota hamutuk 646.389, votu validu 640.967 (99,16), votu branco 1.643 ( 0,25%), votu nulu 3.734 ( 0,58%) votu rejeitadu 28 (0,00%) no votu abandonadu iha 15.

Jornalista: Natalino Costa

Editór     : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here