Misa agradesimentu ba komemorasaun loron restaurasaun independénsia ba da-XX iha Igreja Imaculada Conceição Viqueque, sesta (19/05). Imajen Tatoli/Vitorino Lopes da Costa

VIQUEQUE, 19 maiu 2022 (TATOLI)—Komisaun organizadora restaurasaun independénsia ba da-XX hamutuk ho komunidade Viqueque, kinta ne’e, partisipa misa agradesimentu ba eroi sira-nia kontribuisaun ba luta libertasaun independénsia no husu Maromak haraik grasa no bensaun ba Timor-Leste.

Misa hahú iha tuku 07:30 to’o 10:00 iha Igreja Imaculada Conceição Viqueque no prezide hosi Amu selebrante, Padre Vigáriu Tiago da Costa.

“Ita agradese ba Maromak no husu nafatin grasa no bensaun ba nasaun Timor-Leste ninia Estadu, Governu, Parlamentu no Tribunál, ne’ebé pilár haat ne’e  sai hanesan ai-tonka ba nasaun. Ita mós agradese ba kontribuisaun eroi, eroina no asu’wain sira ne’ebé fó kontribuisaun tomak ba luta libertasaun Timor-Leste,” Padre Vigáriu, Tiago da Costa hateten iha ninia omília, durante misa agradesimentu iha Igreja Viqueque, kinta ne’e.  

Notísia relevante: Viqueque realiza atividade tolu iha ámbitu komemora restaurasaun independénsia

Padre dehan, liuhosi prosesu funu naruk Na’i Maromak la husik timor-oan, maibé akompaña nafatin to’o hetan independénsia.

“Liu tiha tinan-20, ita sente moris nu’udar sidadaun no nu’udar nasaun ida, ne’ebé iha buat lubuk maka timor-oan sira hasoru iha prosesu dezenvolvimentu no moris hakmatek nu’udar sidadaun tanba bele la’o livre. Iha tinan 2022 ita selebra restaurasaun independénsia ida-ne’e, maski ita hasoru dezafiu oin-oin, maibé  ida-ne’e maka prosesu forma nasaun ne’ebé atu hametin liutan,” nia subliña.

Nune’e, nia husu ba povu sira atu perdua malu, nu’udar Maromak perdua no buka hadomi malu no tau ketak ódiu no vigansa malu.

Iha fatin hanesan, Prezidente Komisaun Orgnaizadora munisípiu Viqueque, Cosme Sarmento, agradese ba Amu selebrante ne’ebé prezide misa agradesimentu ba komemorasaun restaurasaun independénsia tanba serimónia ne’e importante ba povu Timor-Leste, espesiál ba munisípiu Viqueque.

“Ha’u lori komisaun organizadora nia naran, agradese ba Amu selebrante no Diretór liña ministériál sira hotu ne’ebé hola parte iha misa agradesimentu ne’e, tanba misa ne’e importante tebes ba  povu Timor-Leste tomak inklui munisípiu Viqueque,” nia hato’o.

Ramata misa, sei kontinua tau ai-funan iha jardín eroi Cararas, hafoin komisaun organizadora sei kontinua halo preparasaun ba serimónia aban iha kampu demokrasia Viqueque vila.

Misa ne’e partisipa hosi administradór munisípiu Viqueque, Januário Soares ‘Bolly’, Diretór liña ministeriál sira iha munisípiu Viqueque, Segundu Komadante Polísia Nasionál Timor-Leste (PNTL) munisípiu Viqueque, Autoridade,  komunidade inklui estudante sira iha postu Viqueque vila.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here