Kampus IOB iha Dili. Imajen/IOB

DILI, 18 maiu 2022 (TATOLI)–Inspesaun Jerál Ministériu Ensinu Superiór Siénsia no Kultura (MESSK) delega ona ekipa haat hodi hala’o serbisu verifikasaun ba prosesu pagamentu izensaun propina ba estudante hosi Instituisaun Ensinu Superiór Públiku Privadu (IESPP) 18.

“Ami iha ona ekipa haat maka hala’o serbisu verifikasaun ba relatóriu ne’ebé Ensinu Superiór Públiku Privadu 18 submete mai ministériu kona-ba pagamentu izensaun propina ba estudante 66.106. Ami-nia serbisu hahú ona iha segunda ne’e no ami hahú uluk iha munisípiu sira, hafoin ramata maka ami sei konsentra iha Dili,” Inspetór Jerál MESSK, Higino Alves, informa iha ninia knaar fatin, iha Vila Verde, kuarta ne’e.

Notísia relevante: Inspesaun Jerál MESSK nota inzensaun propina estudante 66.106 la’o di’ak

Ekipa dahuluk hahú ona ninia verifikasaun relatóriu iha munisípiu Manufahi, ne’ebé konsentra ba Institutu Politékniku Betano (IPB), Institutu Boaventura Timor-Leste (IBTL) no Institutu Superiór Cristal (ISC), ekipa daruak verifika iha Institute of Bussiness (IOB) polu Bobonaro, ekipa datoluk ninia verifikasaun halo ba Dili Institute of Technology (DIT) polu Oé-cusse no ekipa dahaat ninia verifikasaun halo ba East Timor Coffee Institute (ETCI) Ermera no Institutu São João de Brito Kasait.

Tuir Inspetór, objetivu hosi prosesu verifikasaun relatóriu atu buka identifika instituisaun hira mak konsege ezekuta no hira maka la konsege ezekuta orsamentu ne’ebé aloka ba programa inzensaun propina ho montante $5.428.394, ne’ebé antes ne’e transfere ona ba konta bankária IESPP ida-idak hodi halo pagamentu propina ba estudante sira.

“Ita simu ona relatóriu hosi kada instituisaun. Relatóriu ne’e sira sita ona ezekusaun pursentu hira no la ezekuta pursentu hira, ita-nia verifikasaun atu buka hatene karik balun seidauk ezekuta hotu ita husu atubele devolve,” nia tenik.

Relatóriu ne’ebé Inspesaun MESSK simu hosi IESPP 15, maibé sei falta tolu mak seidauk submete relatóriu.

Jornalista  : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here