Inspetór Jerál no Prezidente Komisaun Monitorizasaun no Fiskalizasaun ba Implementasaun Medida Sosio-Ekonomia MESSK, Higino Alves. Imajen Tatoli/Francisco Sony.

DILI, 01 marsu 2022 (TATOLI)–Inspetór Jerál hosi Ministériu Ensinu Superiór Siénsia no Kultura (MESSK), Higino Alves, nota katak inzensaun propina semestre par ne’ebé Instituisaun Ensinu Superiór Públiku no Privadu (IESPP) 18 realiza ona ba estudante 66.106 la’o di’ak.

“Ami finaliza ona monitorizasaun ba prosesu pagamentu propina estudante, horisehik no ohin ami haree implementasaun hotu la’o di’ak,” Inspetór Jerál informa ba Agência TATOLI, iha ninia knaar fatin, Colmera, tersa ne’e.

Notísia relevante: MF realiza pagamentu inzensaun propina faze daruak ba estudante 66.106

Ba kestaun ne’e, Inspetór la fiksa dadus detallu ba kada universidade ida-idak, ho ninia rezultadu implementasaun pagamentu propina ba estudante sira, maibé ba Universidade Nasionál Timor-Lorosa’e (UNTL) atinje ona 80% no Instituto Superior Cristal (ISC) atinje 85%.

“Ida-ne’e hatudu katak prosesu pagamentu propina ba estudante falta tan de’it 20%. Ne’e duni Instituisaun Ensinu Superiór 18 ne’e sei iha tan fulan-ida atu finaliza prosesu hotu, tanba pagamentu ne’e fulan-tolu de’it, ba loron-90, hahú hosi janeiru to’o marsu 2022, bazeia ba diploma ministeriál, ne’ebé marsu nia laran tenke konklui ona pagamentu daruak ne’e,” nia akresenta.

Enkuantu, Reitór Universidade Orientál Timor Lorosa’e (UNITAL), Florindo Pereira, hateten, parte unversidade hetan ona monitorizasaun hosi ekipa Inspesaun Jerál no haree katak laiha problema tanba sira ninia implementasaun la’o di’ak.

“Ami hetan transferénsia subsídiu semester par hosi Governu hamutuk $603.165 no agora ami besik finaliza ona pagamentu ba estudante 8.054. Ami-nia prosesu pagamentu laiha fallansu,” nia tenik.

Totál subsídiu ne’ebé Ministériu Finansa prepara hamutuk $5.428.394, ne’ebé hosi totál subsídiu ne’e maka transfere direta ba konta bankária IESPP 18 hodi bele realiza prosesu pagamentu bazeia ba dadus.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here