Sekertáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Francisco Sony.

DILI, 17 maiu 2022 (TATOLI)—Sentru Formasaun Téknika iha Komunikasaun (CEFTEC-sigla portugés), tersa ne’e, realiza simpóziu nasionál hodi ko’alia kona–ba aspeitu legál, finanseiru no rekursu umanu antes estabelese Institutu Formasaun ba Jornalista iha Timor-Leste.

Notísia Relevante: CEFTEC sei realiza simpóziu nasionál antes estabelese Institutu Formasaun ba Jornalista

“Simpóziu ida-ne’e, hanesan atividade ikus ida ba prosesu preparasaun harii Institutu Profesionál ida ba formasaun jornalista sira, ne’ebé mak CEFTEC durante ne’e hanesan embriaun, sira esforsu makaas hodi halo estudu viabilidade, estudu siéntifiku, prepara kuríkulu, prepara rekursu umanu, hot-hotu tuir polítika VIII Governu Konstitusionál. Entaun, atividade simpóziu ohin ne’e hanesan atividade ikus, atu ita entrega ona ba MAPKOMS atu deside lori ba Konsellu Ministru hodi deside,” Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten ba jornalista sira bainhira reprezenta Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hodi halo abertura ba Simpóziu Nasionál, iha Hotel JL Villa, Dili, tersa ne’e.

Atu CEFTEC hela nafatin ho CEFTEC ka CEFTEC bele muda an ba Institutu Profesionál ida, ne’ebé mak orsida iha ninia autonomia juridiku, autonomia finánseiru, inklui administrativamente presiza autonomia, tanba durante ne’e iha MAPKOMS nia okos hanesan departamentu ida.

Oradór ba simpóziu ne’e mai hosi nasionál no internasionál hodi fó sira-nia kontribuisaun ba Estabelesimentu Institutu Formasaun Jornalista.

“Oradór internasionál ida mai hosi Austrália no ida mai hosi Indonézia. Sira akademiku mai hosi universidade ne’ebé mak iha influénsia, inklui oradór nasionál mai hosi universidade sira. Ne’ebé, ita-nia hakarak sira-nia kontribuisaun hanesan kontribuisaun ikus atu ita entrega relatóriu ba ministru atu lori ba Konsellu Ministru,” nia dehan.

Maske nune’e, oradór ne’ebé iha akadémiku sira sei ko’alia kona-ba prespetiva akademiku, hanesan oradór ida hosi Universidade Indonézia ne’e sei ko’alia kona-ba oinsá iha era dijitál no mídia dijitál.

“Iha era dijitál no media dijitál ita bele adapta an, tanba ita harii instituisaun ne’e tenke adapta an ba situasaun labele lori fali ba kotuk. Alende ne’e, oradór hosi Austrália mós hanesan sira sei ko’alia kona-ba estratéjia, kurríkulu no seluk tan, ne’ebé liga ba oinsá harii institutu ida,” Governante ne’e hateten.

Hafoin simpóziu nasionál ne’e ekipa sei halo relatóriu finál, nune’e bele submete ona ba MAPKOMS.

“Ha’u espera fulan juñu nia laran tenke remata ona, atu ita entrega ona ba ministru atu haree polítika ba oin,” nia esplika.

Koordenadór Sentru Formasaun Tékniku iha Komunikasaun (CEFTEC-sigla portugués), Rafael da Silva Freitas, hateten atividade simpóziu ne’e hanesan atividade kontinuasaun hosi eventu hirak ne’ebé realiza ona, hanesan semináriu internasionál ne’ebé hala’o iha Timor Plaza, foku diskusaun grupu ne’ebé halo iha Delta Nova no atividade seluk ne’ebé halo iha munisípiu 12, inklui Rejiaun Administrasaun Espesiál Oé-Cusse Ambeno (RAEOA).

Atividade hirak liu ona, envolve direita hosi Sosiedade Sívil, Konsellu Imprensa (CI), Jornalista Senhor, Asosiasaun Jornalista, Na’in ba média no Akademiku sira.

“Ohin, ita halibur hamutuk iha ne’e ho hanoin ida katak oinsá bele finaliza no armóniza hanoin no ideia sira iha platáforma dokumentu formál ida ba foti desizaun sira-ne’e atu sai hanesan matadalan ba sira, atu tetu tuir atribuisaun kompeténsia ne’ebé sira iha,” nia dehan.

Entaun, nu’udar tékniku ekipa CEFTEC kontribui no ezekuta nafatin ordem hirak ne’ebé hatu’ur tuir planu asaun anuál ne’ebé atribui mai CEFTEC.

Entretantu, simpóziu nasionál ne’e partisipa hosi oradór Internasionál mai hosi Austrália no Indonézia no oradór Nasionál no Akademiku sira.

Notísia Relevante: Estabelesimentu Institutu Formasaun ba Jornalista atinje ona 70%

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here