Diretór DPORAL, Ângelo Edmundo Belo. Foto/Egas Cristovão.

DILI, 16 maiu 2022 (TATOLI)— Ekipa Konjunta Ministériu Saúde (MS) hamutuk ho Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA,I.P), segunda ne’e, hahú halo inspesaun ba kondisaun ai-han no otél sira ne’ebé prepara ba bainaka espesiál hosi rai li’ur mai partisipa seremónia investidura Prezidete Repúblika Eleitu no loron Restaurasaun Indepedensia dala-20.

Objetivu hosi inspesaun ba ai-han iha restaurante sira no ambiente otél sira atu garante hahán no fatin ne’ebé ijiene hodi bainaka bainaka espesiál bele hela.

Notísia relevante: Prevene COVID-19, MS sei halo inspesaun ba otél sira ne’ebé bainaka espesiál hela

“Ita halo inpesaun hodi haree kondisaun ba produtu ka ai-han tenke ho ijiene ne’ebé mak uza hodi tein no haree mós kondisaun ambiente otél sira. Nune’e ita bele oferese aihan no fatin ijiene ba bainaka espesiál sira,” Diretór Departamentu Planeamentu, Operasionál Risku Aihan no Laboratóriu AIFAESA, Angelo Edmundo Belo, hateten ba jornalista sira hafoin ramata enkontru konjunta iha salaun Palásiu Sinzas-Caicoli.

Ekipa Konjuta hala’o ona inspesaun ba otél sira ne’ebé bainaka espesiál sira mai hela hanesan Hotél Timor, Palásiu Nobre, Beach Garden, Timor Plaza, Golgota no Novo-Turizmo.

“Ami mós hakarak haree kedas otél sira ne’ebé mak konvidadu sira atu hela no verifika kedas kondisaun sira no ninia ijiene inklui haree liuba hahan sira ne’ebé mak oferese ba bainaka sira,” nia afirma.

Nia afirma, ekipa konjuta mós kontinua halo inspesaun ba loja sira ne’ebé mak besik restaurante no empreza sira ne’ebé oferese produtu sira hodi asegura hahán ne’ebé saudavél ba bainaka espesiál hosi rai li’ur.

MS ho AIFAESA halo atividade konjunta ida ne’e ho polítika ida atu komemora loron mundiál ai-han seguru ne’ebé mak Organizasaun Mundiál Saúde (OMS) define iha loron 7 juñu.

Atividade inspesaun ne’e hala’o hosi AIFAESA, Ministériu Saúde (MS), Ministériu Turizmu Komérsiu no Indústria (MTCI), TANE Konsumidór, Ministériu Agrikultór no Peska (MAP) no Laboratóriu Nasionál Saúde (LABNAS).

Notísia relevante: MI-PNTL diskute estratéjia fó seguransa ba bainaka espesiál hosi rai li’ur

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here