Vise-Ministra Turizmu Komunitária no Kulturál, Inâcia da Conceição Teixeira. Imajen Tatoli/Francisco Sony

DILI, 16  maiu 2022 (TATOLI)-Ministériu Turizmu Komérsiu no Indústria (MTKI) liuhosi Diresaun Nasional Promosaun Turístiku no Relasaun Internasional (DNPTRI), segunda ne’e, realiza abertura kompetisaun pintura 2022, iha ámbitu komemorasaun independénsia ba da-XX iha loron 20 maiu.

Vise-Ministra Turizmu Komunitária Kulturál, Inácia da Conceição Teixeira, hateten, eventu ne’e organiza ho objetivu atu promove marka Explore The Undiscovered  ba mundu internasionál no nasionál, inklui hasa’e koñesimentu no hadi’a kualidade pintura ba juventude ne’ebé iha kreatividade no promove área turizmu liuhosi pintura.

“Agradese tebes ba juventude, ho ita boot sira-nia partisipasaun ohin ita bele realiza atividade kompetisaun pintura. Kona-ba turizmu, dalaruma di’ak bainhira ita espresa liuhosi talentu iha área pintura. Ha’u espera oportunidade ohin ita-boot sira bele espresa talentu kona-ba Timór nia furak iha área turizmu, tanba ne’e maka MTKI hakarak dezenvolve talentu liuhosi pintura,” Vise-Ministra hateten hanesan haktuir iha nota komunikadu ne’ebé Agência Tatoli asesu.

Notísia relevante: Deonisio Vilhas sai vensedór iha kompetisaun pintura organiza hosi MTKI

Atividade kompetisaun ne’e ho tema: “Promove atrasaun turístiku liuhosi talentu pintura”, ne’ebé hala’o iha Sentru Informasaun Turíztiku Lecidere.

Nune’e, Diretór Nasionál Promosaun Turístiku no Relasaun Internasional,  António da silva, hateten, atividade kompetisaun pintura ne’e iha tinan ne’e hala’o  ba dala-rua ona, dahuluk realiza iha tinan kotuk, ne’ebé monu iha loron turizmu mundiál no tinan ne’e realiza iha ámbitu komemorasaun restaurasaun indepedénsia ba da-XX.

“Agaradese tebes tanba tinan ne’e grupu juventude barak mai tuir eventu kompetisaun pintura, la’ós mai hosi munisípiu Dili, maibé hosi munisípiu seluk mós tinan uluk ita iha grupu 10 de’it, maibé tinan ne’e aumenta ba grupu 20,” nia akresenta.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here