DILI, 27 setembru 2021 (TATOLI)—Pintór hosi Grupu Arte Moris, Deonisio Vilhas, sai vensedór primeiru lugar iha kompetisaun pintura ne’ebé organiza hosi Ministériu Turizmu, Komérsiu no Indústria (MTKI) iha ámbitu komemorasaun loron mundiál turizmu.
Nune’e, vensedór ne’ebé pinta uma-tradisionál Lospalos ne’e, hateten, nia parte hili tema ne’e tanba sai hanesan identidade Timór.
“Daudaun ne’e, uma-tradisionál ne’e ho kondisaun a’at hela, tanba ne’e maka ha’u pinta ida-ne’e atu buka promove área potensiál tanba ita tenke hadi’a maka foin bele promove, nune’e dada turizta sira mai,” Deonisio Vilhas, dehan, iha Sentru Informasaun Turíztika, iha Lecidere, segunda ne’e.
Notísia relevante: Komemora loron internasionál turizmu, MTKI realiza kompetisaun pintura
Aleinde ne’e, Pintór ne’e hakarak loke ema-nia laran hodi kontinua kuidadu no promove turizmu kulturál.
Iha biban hanesan, Ministru Turizmu, Komérsiu no Indústria, José Lucas do Carmo da Silva, kongratula manán-na’in iha kompetisaun pintura.
“Alin sira halo pintura hanesan ne’e, la’ós ema hotu bele halo talentu ne’e, liuhosi eventu importante ne’e, ita-boot sira mai expresa no hatudu idaidak ninia talentu hodi bele konstribui ba setór turizmu,” Ministru louva.
Governante ne’e promete, ba oin atividade hanesan sei halo beibeik iha territóriu tomak atu buka talentu joven sira.
Vensedór ba segundu lugar okupa husi Criser P. Bento, terseiru Lugar okupa hosi Sancho hosi grupu Arte Fini no kuartu lugar okupa hosi Sangar Bui Bere nia riska, Mariana Albetina Soares.
Prémiu ba kompetisaun pintura ne’e, primeiru lugar hetan $300, segundu lugar $200 no terseiru lugar $150, ne’ebé hetan mós ho sertifikadu hosi MTKI.
Jornalista : Natalino Costa
Editora : Julia Chatarina
